قازاق جەرىنە تۇڭعىش رەت تابانى تيگەن يزرايل پرەمەر-مينيسترىنە پرەزيدەنتتەرگە ساي قۇرمەت كورسەتىلدى. پارلامەنتتىك باسقارۋدا بولعاندىقتان بەنيامين نەتانياحۋدىڭ بيلىگى دە، قۇزىرەتى دە كەڭ. الەمدەگى ساياسي سالماعى اۋىر ساياساتكەرلەردىڭ بىرىمەن اقوردادا كەلىسسوز جۇرگىزگەن نۇرسۇلتان نازاربايەۆ يزرايلدەن ۇيرەنەتىن شارۋا كوپ ەكەنىن جاسىرماي ايتتى. اسىرەسە، قازاقستاندى بۇل مەملەكەتتىڭ اۋىل شارۋاشىلىعى، مەديسينا مەن جاڭا تەحنولوگيا سالاسىنداعى جەتىستىگى قاتتى قىزىقتىرىپ وتىر. سونداي-اق، اسكەردى قارۋ-جاراقپەن قامتۋ، ەكسترەميزمگە تويتارىس بەرۋ بويىنشا دا كۇش بىرىكتىرمەك. بۇگىن وسىنداي بىرنەشە كەلىسىمگە قول قويعان نازاربايەۆ پەن نەتانياحۋ الىس-بەرىستى، بارىس-كەلىستى ارتتىرۋعا دا ۋاعدالاستى دەپ حابارلايدى ktk.kz
بەنيامين نەتانياحۋ، يزرايل پرەمەر-مينيسترى:
-قازاقستاننىڭ قازبالى بايلىققا كىرىپتار بولمايتىن ەكونوميكاعا اۋىسىپ جاتقانىن بىلەمىن. بۇنى جالعاستىرا بەرۋ كەرەك. ماسەلەن، بىزدە شيكىزات جوق. جاقىندا عانا گاز قورى تابىلدى. جالپى، قازاقستانمەن تاجىربيە بولىسۋگە، سەنىمدى سەرىكتەس بولۋعا ءازىرمىز.
نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:
-ەكى ەل تۇرعىندارى ۆيزاسىز ءجۇرۋى ءتيىس. تىكەلەي اۋە رەيسى دە، اشىلۋى قاجەت. سونىمەن قاتار ءيزرايلدىڭ الەمدەگى وزىق مەديسيناسىنان ۇيرەنەرىمىز كوپ. ءبىزدىڭ ماماندار وسى جاقتان وقىپ كەلىپ جاتىر. وسىعان وراي ءبىرقاتار ۋنيۆەرسيتەتتىك كلنيكالاردى يزرايلدىك كومپانيالاردىڭ باسقارۋىنا بەرۋگە دايىنبىز.
