بريتانيا ۋكرايندىق اسكەردى دايىنداۋ باعدارلاماسىن تاعى ءبىر جىلعا سوزدى. ونى رەسەيدىڭ «ارانداتۋشى» ارەكەتتەرىمەن ءتۇسىندىردى دەپ حابارلايدى bbc.com.
ەلدىڭ قوعانىس ءمينيسترى مايكل فەللون حابارلاعانداي بريتاندىق اسكەري نۇسقاۋشىلار ۋكراينادا 2018 جىلعا دەيىن قالاتىن بولدى.
«بريتاندىق نۇسقاۋشىلارمەن ۋكرايندىق اسكەردى دايىندايتىن باعدارلامانى ۇزارتۋىمىز، ءبىزدىڭ ۋكراينانى قولدايتىنىمىزدان حابار بەرەدى. رەسەيدىڭ باسقىنشىلىق ارەكەتىنىڭ الدىندا ۋكراينانىڭ تاۋەلسىز ەل بولىپ، شەكارالىق ءبىرتۇتاستىعىن ساقتاۋىن قالايمىز» دەدى فەللون.
«ITV» ارناسىنىڭ مالىمەتىنشە، 2017 جىلدىڭ ناۋرىز ايىندا بريتاندىق نۇسقاۋشىلاردىڭ دايىندىعىنان 5000 ۋكرايندىق اسكەري قىزمەتكەر وتەدى. وتكەن جىلدىڭ ناۋرىز ايىندا بريتاندىق نۇسقاۋشىلار ۋكراينانىڭ شىعىسىنداعى دحر مەن لحر اسكەرىمەن سوعىسىپ جاتقان ۋكرايندىق اسكەردى دايىندادى.
سول كەزدە بريتانيانىڭ پرەمەر-مينيسترى قىزمەتىن اتقارعان ديەۆيد كەمەرون، جاۋيا اسكەردى، لوگيستيكا، بارلاۋ مالىمەتتەرىنە ساراپتاما جانە مەديسينالىق كومەك كورسەتۋ بويىنشا وقىتىپ جاتقانىن مالىمدەگەن.
سول كەزدە ۋكراينادا 75 اسكەري نۇسقاۋشىلار جۇمىس ىستەيدى دەپ كورسەتىلگەن ەدى. بريتان ۇكىمەتى ۋكرايندىق اسكەرگە – ءدارى قوبديشاسى، تۇندە بارلايتىن قۇرال جانە جاتىن قاپتارىن جەتكىزگەن.
