شىمكەنت اۋماعىنداعى جەردىڭ 62 219 گەكتارى اۋىل شارۋاشىلىعىنا پايدالانۋ ماقساتىندا بەرىلگەن. قالاعا جاقىن ماڭداعى ەلدىمەكەندەردىڭ قوسىلۋى ەسەبىنەن اگروقۇرىلىمداردىڭ سانى بيىلدىڭ وزىندە 3،5 مىڭعا ارتتى. ءقازىر قالادا بارلىعى 4152 شارۋا قوجالىعى تىركەلگەن بولسا، ولار مال باسىن كوبەيتۋمەن قاتار ءوز ونىمدەرىن شىعارىپ جاتىر.  شىمكەنت قالاسىنىڭ 2020 الەۋمەتتىك-ەكونوميكالىق دامۋ تۇجىرىمداماسىنا سايكەس اۋىل شارۋاشىلىعى سالاسىن دامىتۋدا كەلەسى جىلدان باستاپ  ءبىرشاما وزگەرىستەر ورىن الماق. ياعني، ءونىم كولەمىن ارتتىرامىن دەگەن ديقاندارعا قولداۋ كورسەتىلەتىن بولادى. 

ءيا، بۇل ماقساتتى جۇزەگە اسىرۋدا جالپى 1221 گەكتار جەر بولىنەتىن بولدى. اتاپ ايتقاندا، ونىڭ 5 گەكتارىندا مال سويۋ الاڭدارى، 136 گا يندۋستريالدىق تاماق ونەركاسىبى، 300 گا قارقىندى باۋ ەگۋگە، 200 گا جىلىجاي كەشەنى، 100 گا گۇل جانە اعاش پيتومنيگىن قۇرۋ، 100 گا كوكونىس پەن باقشا ەگۋ، 380 گا جەرگە مال شارۋاشىلىعىن دامىتۋعا بەرىلەدى. مۇنداعى باستى ماقسات – شارۋالارعا قولداۋ كورسەتە وتىرىپ، ساپالى ءونىم الۋدى كوبەيتۋ. اۋىلشارۋاشىلىق ونىمدەرىن وندىرۋدە ينتەنسيۆتى باۋ ەگۋ، جىلىجايدا تامشىلاتىپ سۋعارۋ سەكىلدى جاڭا تەحنولوگيالاردى قولدانعان، اۋىسپالى ەگىستى جۇزەگە اسىرۋ مەن اسىل تۇقىمدى مال باسىن كوبەيتۋگە قىزىعۋشىلىق تانىتقان شارۋالارعا جاعداي جاسالادى. دەگەنمەن، ءونىم الۋدا مەيلىنشە وزىق تەحنولوگيالاردى قولدانعاندىعى ەسكەرىلەدى. جاي عانا ەمەس، ءبىر اينالىمدا 400-500 توننا كوكونىس بەرۋگە لايىقتالعان فەرمەرلىك جىلىجايلاردى كوبەيتسەك دەيمىز. ەكىنشى جاعىنان ءونىمنىڭ ساپاسىن جاقسارتۋدا قولعا الۋدا عىلىمي-زەرتتەۋ ينستيتۋتتارىنىڭ ماماندارىن تارتىپ جاتىرمىز. شارۋالار مەن عالىمداردىڭ باسىن قوسىپ، ەلدىمەكەندەردە سەمينارلار وتكىزۋدى كەلەسى جىلى كوبەيتەمىز.

عاني قۇرمانباي

قالالىق اۋىل شارۋاشىلىعى جانە ۆەتەريناريا ءبولىمىنىڭ باسشىسى

http://kazrabat.kz/