«قازاقتى بۇكىل الەمگە ايشولپان تانىتتى. پالەن مينيسترلىك، ونداعان ساياساتكەر جاساي الماعاندى ول جاسادى. ۆۆس، سNN ول تۋرالى فيلم ءتۇسىرىپ، وسكاردان ءۇمىتتى. 13 جاستاعى كىشكەنتاي قىزدىڭ ءبىر مىقتىلىعى مونعول ەلىنىڭ ازاماتى بولسا دا ءوزىنىڭ قازاق ەكەنىن، تۋعان جەرى التاي تاۋى ەكەنىن الەم جۋرناليستەرىنە جەتە تۇسىندىرۋىندە. وسى ءبىر قارشاداي قىزدىڭ ارقاسىندا باتىس جۇرتى بوراتتى ۇمىتىپ، قازاقتى جاقسى قىرىنان تاني باستادى. مونعوليادا ول ەڭ ابىرويلى قازاقتىڭ بىرەگەيى». بۇل ءسوزدى جازعان سول باي ولكەدە تۋىپ ءوسىپ، بۇگىندە ەلدە ەڭبەك ەتىپ جۇرگەن حالىقارالىق جۋرناليست قۋاندىق شاماحاي ۇلى. 

16 جەلتوقسان كۇنى ۇلىبريتانيانىڭ كينوپروكاتىنا موڭعولياداعى 13 جاسار قازاق قىزى ايشولپان جايىنداعى «The Eagle Huntress» دەرەكتى ءفيلمى شىقتى. ايشولپان ءوز اۋلەتىندەگى  12 اتا تاريحىندا شىققان تۇڭعىش بۇركىتشى قىز. ءفيلمنىڭ تۇساۋكەسەرىنە اكەسى ەكەۋى قازاقتىڭ ۇلتتىق كيىمىن كيىپ كەلگەن. «وسكار» الۋعا كەلگەندە ۇلتتىق كيىمىن تاستاماعان دجەكي چان سىندى ايشولپان مەن اكەسى دە جارادى! قازاقتىڭ ۇلتتىق قۇندىلىعىن، ۇلتتىق ساناسىن الەمگە پاش ەتتى. ءفيلمدى ەكى ادام عانا تۇسىرگەن، بيۋدجەتى وتە از وسى فيلم ءقازىر اقش پروكاتىندا 1،5 ملن دوللار جيناعان.

ال، بۇگىن، قازاقتىڭ بۇركىتشى قىزى موڭعوليانىڭ تانىمال 50 ادامىنىڭ ءبىرى اتاندى. قۇرامىنا ساياساتكەرلەر، سپورتشىلار، ونەر ساڭلاقتارى، حالىقارالىق دارەجەدەگى تانىمال تۇلعالار كىرگەن بۇل توپتى حالىقتىڭ اشىق داۋىس بەرۋى بويىنشا ىرىكتەپ العان.

«ساياساتكەر»، «جاڭالىق اشۋشىلار»، «جەڭىمپازدار»، «سيمۆولدار» جانە 2016 جىلدىڭ ەڭ ۇزدىك «جانجالشىلارى» دەگەن 5 توپ بويىنشا ساراپتاپ، حالىقتىڭ تاڭداۋى بويىنشا انىقتالعان 2016 جىلعى موڭعوليانىڭ ەڭ ۇزدىك 10 «سيمۆولدىق» ادامىنىڭ ءبىرى بولىپ تانىمال بۇركىتشى قىز ايشولپان نۇرعايىپ قىزى تاڭدالدى.

تاعى ءبىر ايتا كەتەرلىگى موڭعوليانىڭ ۇزدىك 50 ادامىنىڭ قاتارىندا ريو وليمپياداسىنا قازاقستان اتىنان ونەر كورسەتىپ، قازاقستان قورجىنىنا دزيۋدودان العاشقى مەدالدى (قولا) سالعان دزيۋدوشى قىز – وتگونسەسەگ گالباداراح تا بار. كەنجەگۇلىمىز 2016 جىلعى موڭعوليانىڭ ۇزدىك 10 «جەڭىمپازىنىڭ» ءبىرى بولعان ەكەن.

ءتىپتى، الەمگە تانىلعان ءانشى Sia ايشولپان نۇرعايىپ تۋرالى فيلمگە سۋندترەك بولىپ تابىلاتىن «Angel by the Wings» اتتى جاڭا ءانىن جازدى. دجاز جانە پوپ ستيلىندەگى ورىنداۋشى اۆستراليالىق سيا فەرلەر رەجيسسەر وتتو بەللدىڭ «The Eagle Huntres» دەرەكتى فيلمىنە باللادا-ساۋند ترەگىن ورىندادى.
تاۋەلسىز قازاقستاندى قازاقتىڭ ەلى رەتىندە الەمگە تانىتۋ وڭاي بولعان جوق. ءبىرى قازاقتىڭ دالاسىن ۇشى-قيىرى قۇم تومپەشىكتى ءشول دالا دەپ بىلسە، ءبىرى قازاق ەلىن «بورات» سايقىمازاق كورسەتكەن ەل سياقتى ار ارزان، ەتەگى جەڭىل ازعىن ەل دەپ تانىدى. ايشولپان اتاققا ۇمىتىلعان جوق، ونى اتاق پەن ابىروي ءوزى ىزدەپ كەلدى. ونى الەم تانىدى. ايشولپان ارقىلى الەم قازاقتى تانىدى. قازاقتىڭ ءداستۇرىن تانىدى. قازاقتىڭ ءداستۇرى مەن ءومىر عۇرپى ارقىلى قازاقستان دەيتىن ەلدىڭ بار ەكەنىن تانىدى.

P.S: ايشولپان قازاقستانداعى سوڭعى 20 كۇندە تاراتىلعان مەدال مەن وردەننىڭ بىردە-بىرىن العان جوق. ول ءوزى تانىتقان ەلدىڭ، ءوزى تانىتقان ۇلتتىڭ قوشامەتىن ءالى ەستىگەن دە كورگەن جوق. ايشولپان – قازاقتىڭ توبەسىنە كوتەرىپ، ماقتانىش ەتۋگە لايىق تۇلعاسى.

قارابۋرا قۇلتاي