تۇركيا پرەزيدەنتى ەردوعان رەسەي ەلشىسىنە جاسالعان قاستاندىققا بايلانىستى مالىمدەمە جاسادى. تۇرىك پرەزيدەنتى مالىمدەمەسىندە پۋتينگە، دوس ورىس حالقىنا، كارلوۆتىڭ وتباسىنا قايعىرىپ كوڭىل ايتتى. رەسەي مەن تۇركيا ىنتىماقتاستىعى تۋرالى باسا ايتقان ەردوعان ءبىر اپتا بۇرىن عانا كارلوۆتىڭ ءوز رەزيدەنسياسىندا بولعانىن ايتتى. كارلوۆ ءبىر اپتا بۇرىن تاتارستان پرەزيدەنتىنىڭ تۇرىك پرەزيدەنتىمەن جولىعۋىندا بىرگە بولعان.
رەسەي پرەزيدەنتى پۋتين ءوز مالىمەدەسىندە اتالعان وقيعانىڭ پروۆاكاسيا ەكەنىنە نازار اۋداردى.
ال، تۇركيانىڭ ەكس-پرەزيدەنتى ابدۋللا گۇل Twitter-دە ورىس تىلىندە مالىمدەمەلەر جاساپ، رەسەي حالقىنا كوڭىل ايتتى.
ماسكەۋگە جەتكەن تۇركيا سىرتقى ىستەر ءمينيسترى ميەۆليۋت چاۆۋشوگلۋ دا ماسكەۋدەن مالىمدەمە جاسادى. ول ەلشىگە جاسالعان قاستاندىقتى ايىپتاپ، كارلوۆ قازاسى ءۇشىن رەسەي حالقىنا كوڭىل ايتتى. ونىڭ سوزىنشە بۇل قاستاندىقتى ۇيىمداستىرعاندار رەسەي مەن تۇركيانىڭ جاڭا نىعايعان ىنتىماقتاستىق قاتىناسىنا كولەڭكە تۇسىرگىسى كەلەدى.
بۇنداي پىكىردى قاستاندىقتان كەيىن ديپلوماتتىڭ دەنەسى جەتكىزىلگەن اۋرۋحانا الدىندا جۋرناليستەرگە سۇحبات بەرگەن انكارانىڭ مەرى مەليح گوكچەك تە "بۇل قاستاندىق تۇركيانىڭ رەسەيمەن قارىم-قاتىناسىن بۇزۋدى كوزدەگەن" دەپ مالىمدەگەن ەدى.
سونداي-اق، رەسەيدىڭ سىرتقى ىستەر ءمينيسترى باسپا ءسوز حاتشىسى ماريا زاحاروۆا دا رەسمي مالىمدەمە جاسادى.
Habertürk ارناسى تاراتقان اقپاراتقا ساي، قاستاندىق ارەكەتىن ورىنداعان انكارا پوليسەيى ميەۆليۋت مەرت التينتاشدىڭ سوڭعى ەكى جىلداعى تەلەفون سويلەسۋلەرى زەرتتەلىپ جاتىر.
قاستاندىقتىڭ ارتىندا ۇلكەن كۇشتەردىڭ تۇرعانى دا ايتىلدى. پىكىرگە ساي، قاستاندىق جاساۋشىنىڭ «ەلشىنىڭ ول جاققا كەلۋى تۋرالى» اقپاراتتى ءبىلۋى مۇمكىن ەمەس ەدى.
قاستاندىق جاساعان پوليسيا قىزمەتكەرىنىڭ بىرگە تۇراتىن دوسى دا پوليسيا قىزمەتكەرى بولعان. ول دا ءقازىر تۇتقىنعا الىندى. سونداي-اق، قاستاندىق جاساپ ءوزى دە ولگەن جەندەتتىڭ اناسى مەن قارىنداسى تۋعان قالاسى ايدىندا تۇتقىنعا الىندى.
