قازاق بيلىگى اتالعان ەلدەردە تۋريستىك جانە باسقا دە سەبەپتەرمەن جۇرگەن قازاقستان ازاماتتارىن قاتاڭ ساقتىق شارالارىن جاساۋعا، بارىنشا اباي بولۋعا شاقىرادى. بۇل تۋرالى ق ر ينۆەستيسيالار جانە دامۋ مينيسترلىگىنىڭ تۋريزم يندۋسترياسى دەپارتامەنتىنىڭ ديرەكتورى مارات يعالي Facebook جەلىسىندەگى پاراقشاسىندا جازدى. 

ايتا كەتەيىك، 20 جەلتوقساندا بەرلين ورتالىعىندا گەدەحتنيسكيرحە شىركەۋىنىڭ ماڭىندا جارمەڭكە ءوتىپ جاتقان جەردە جۇك كولىگى ادامدار توبىن قاعىپ كەتكەن بولاتىن. سالدارىنان سوڭعى اقپاراتقا ساي 12 ادام قازا تاۋىپ، 48 ادام جاراقات الدى. Deutsche Welle باسىلىمنىڭ مالىمەتىنشە، وقيعا ورنىن پوليسيا قورشاۋعا العان. مۇندا ءورت سوندىرۋشىلەر مەن جەدەل جاردەم كولىكتەرى كەلگەن. سوڭعى مالىمەتكە ساي جۇك كولىگىن تىزگىندەگەن جەندەت تۇتقىندالعان. دايش-تىڭ بۇل قىلمىستى ءوز موينىنا العانى حابارلاندى.

مارات ءيعاليدىڭ ايتۋىنشا، ق ر ءسىم دەپارتامەنتىنە قازاقستاندىق تۋريستەردىڭ زارداپ شەككەنى جايلى مالىمەت تۇسپەگەن. "ق ر ءسىم تۋريزم يندۋسترياسى دەپارتامەنتىندەگىلەر گەرمانيا اۋماعىندا جۇرگەن قازاقستاندىق تۋريستەرگە اباي بولۋعا، قاۋىپسىزدىك ەرەجەلەرىن ساقتاۋعا جانە ادام كوپ جينالعان جەرلەردە جۇرمەۋگە كەڭەس بەرەدى"، - دەپ جازدى مارات يعالي.

سونداي-اق، 19 جەلتوقساندا رەسەيدىڭ تۇركياداعى ەلشىسىنە قاستاندىق جاسالعان بولاتىن. ساراپشىلار بۇدان كەيىن تاياۋ شىعىس مۇلدە ۋشىعىپ كەتۋى مۇمكىن دەپ وتىر. ايتا كەتەر بولساق، ماسكەۋدە بۇگىن سيريا ماسەلەسى بويىنشا يران، تۇركيا جانە رەسەيدىڭ ءۇش جاقتى كەزدەسۋى وتەدى. اتالعان جاعدايعا قاراماستان ەلدەر جينالىسقا قاتىساتىنىن مالىمدەدى.