مەملەكەتتىك بيۋدجەت بويىنشا اسىرا ورىنداۋ سوماسى 396 ملرد تەڭگەنى قۇرادى، رەسپۋبليكالىق – 255 ملرد تەڭگە، جەرگىلىكتى بيۋدجەت بويىنشا – 141 ملرد تەڭگە.

«11 ايدىڭ ىشىندە وتكەن جىلدىڭ ۇقساس كەزەڭىمەن سالىستىرعاندا 31،8 پايىزعا مەملەكەتتىك بيۋدجەت كىرىستەرى بويىنشا ءوسىم بايقالادى. رەسپۋبليكا بويىنشا – 41،1 پايىز جانە جەرگىلىكتى بيۋدجەت بويىنشا – 13،6 پايىز ءوسىم»، – دەدى ب. سۇلتانوۆ. بۇل تۋرالى پرەمەر-مينيستر سايتى حابارلادى.

جالپى مەملەكەتتىك بيۋدجەت كىرىستەرى 107،3 پايىزعا، رەسپۋبليكالىق 106،6 پايىزعا، جەرگىلىكتى 109،1 پايىزعا ورىندالدى. سپيكەردىڭ ايتۋىنشا، جىل قورىتىندىسى بويىنشا شامامەن 250-300 ملرد تەڭگەگە سالىق ءتۇسىمىنىڭ ايتارلىقتاي اسىرا ورىندالۋى كۇتىلۋدە.  «بۇل ۇلتتىق قوردان كەپىلدەندىرىلگەن ترانسفەرتتى تارتپاۋعا مۇمكىندىك بەرەدى»، –  دەدى قارجى ءمينيسترى.

مەملەكەتتىك بيۋدجەت شىعىندارى شامامەن 9 ترلن تەڭگەگە جەتىپ، 20 پايىزعا ارتتى. يگەرۋ قارقىنى وتكەن جىلمەن سالىستىرعاندا جاقسىراق. مەملەكەتتىك بيۋدجەت شىعىنى 97 پايىزعا، رەسپۋبليكالىق 98،2 پايىزعا جانە جەرگىلىكتى 96،6 پايىزعا ورىندالدى.  جىل قورىتىندىسى بويىنشا رەسپۋبليكالىق بيۋدجەت شىعىنىن ورىنداۋ 98،6 پايىز شاماسىندا كۇتىلۋدە.