بۇگىندە ۇلكەن قالالاردىڭ كوشەلەرىنەن قايىرشىلاردى ءجيى كورەتىن بولدىق. ولاردى كورگەن سايىن مۇندايلار نەگە كوبەيىپ كەتتى دەپ كوڭىلىمىز ءتۇسىپ قالاتىنى راس.
كەشەگى اپتادا ءبىز شىمكەنتتەگى قازىبەك بي كوشەسىنىڭ بويىندا وتكەن-كەتكەنگە قول جايىپ جۇرگەن قاريانى بايقادىق. قورقىپ قالسا كەرەك، ءبىزدىڭ وزىنە قاراي جۇرگەنىمىزدى بايقاعان ول كىسى قولىنداعى ىدىسىن ارتىنا جاسىردى. قاسىنا بارعانىمىزدا ءبىزدى اكىمشىلىكتەن كەلدى دەپ ويلاسا كەرەك، نانعا اقشا سۇراپ جۇرگەنىن ايتىپ جىلارمان كۇيگە ءتۇستى.
«جاسىم 66-دا، ايەلىم دە 60-تان اسىپ بارادى، – دەدى ءوزىن بەكەت نۇردين ۇلى نازاربايەۆپىن دەپ تانىستىرعان قاريا (سۋرەتتە). – سارىاعاشتىڭ تۋمالارىمىز. ەكەۋمىزدە دە ەشقانداي قۇجات جوق بولعاندىقتان زەينەتاقى الا الماي ءجۇرمىز. ەكى ۇل، ەكى قىزىم بار. ءبىر ۇلىم قوي باعادى، ەكىنشىسى اراقتى كوپ ءىشىپ، باۋىردان ايىرىلدى. ءار جەردە جۇمىس ىستەپ جۇرەدى. قىزىمنىڭ بىرەۋى بادامدا، ەكىنشىسى ەكى بالاسىمەن قولىمدا. ولاردىڭ بارىنە نان كەرەك.
بۇرىن قىرعى بازاردا اربا ايداپ ەدىم، كەيىن وعان جاراماي قالعاندىقتان وسىلاي كوشەگە شىعىپ قايىرشىلىق جاساۋعا تۋرا كەلدى. كۇنىگە 1000 – 2000 تەڭگە تابامىن. كەيدە سونى دا جانى اشىمايتىن پوليسيا قىزمەتكەرلەرى تارتىپ الىپ كەتەدى. ولار ماعان بۇلاي كوشەگە شىقپا دەيدى، سوندا نە ىستەيمىن، ۇيدە جاتا بەرسەك، اشتان ولەمىز عوي. ءوزىمىز ايىنا 10 مىڭ تەڭگەدەن پاتەر جالداپ تۇرامىز. اقشانى ۋاقتىلى بەرمەسەك پاتەردەن دە قۋىپ شىعادى. اكىمشىلىكتىڭ قىزدارى دا كەلىپ قايىرشىلىق جاساما، كەت دەيدى. ءبىراق كومەكتەسەمىن دەگەندى ايتقان بىرەۋى جوق. تىم قۇرىسا قۇجاتىمدى قالپىنا كەلتىرىپ بەرسە زەينەتاقى الىپ وتىرار ەدىم. پەنسياعا شىققىم كەلەدى».
بەكەت قاريانىڭ اڭگىمەسىن تىڭداپ بولىپ، قوشتاسىپ تۇرعانىمىزدا ول كىسى بىزگە تاڭەرتەڭنەن بەرى ەشتەڭە تاتپاعانىن ايتىپ نانعا اقشا تاستاپ كەتۋىمىزدى ءوتىندى. قالتامىزداعى تەمىر تەڭگەلەردى العاننان كەيىن ول سول جەردەگى دۇكەنگە قاراي كەتىپ بارا جاتتى.
...جالپى، قازاقستاندا كوشەدە قول جايعاندار بولماسىن دەسەك، قايىرشىلارعا ەمەس، قايىرشىلىققا قارسى كۇرەس تۋرالى زاڭ قابىلداۋ كەرەك-اۋ. ايتپەسە ونسىز دا نان تاپپاي جۇرگەندەردى ايىپپۇل سالىپ كوشەگە شىعارماي قويامىز دەگەن اقىلعا سىيمايتىن سەكىلدى.
دەرەككوز: zamana.kz
اۆتور: ۇ.تامەنوۆ
