"ۇلانعا" شىققان وقۋشىنىڭ حاتى. ءبىراق، وسى حات ءبىراز كىسىلەرگە ۇنامادى. سىزدەر دە "جازۋشىنىڭ دەنساۋلىعى، اۋىرعانى وقىرمانعا قىزىق ەمەس" دەپ سوكپەگەيسىزدەر. بۇل جەردە بالا جۇرەگىنىڭ ءلۇپىلى، شىن ىقىلاسى جاتىر. ول ءوزىنىڭ سۇيىكتى جازۋشىسىنا العىسىن ايتىپ، ەندى اۋىرماسا ەكەن دەگەن بالاڭ تىلەگىن ءبىلدىرىپ وتىر. جۇرەكتى ەلجىرەتەر مۇنداي حاتتى گازەتكە قالاي جاريالامايسىڭ؟! تاپ قازىرگى كەزدە قاي زيالى دۋلات اعاداي قازاق ءۇشىن شىر-پىر بولا الادى؟ ويلانىپ كورىڭىزشى. كوكتەمدە كىمنىڭ كىم ەكەنىن كوردىڭىزدەر عوي كوپشىلىگىڭىز...

بۇگىن دۋلات اعا يسابەكوۆتىڭ تۋعان كۇنى ەكەن. وقۋشىنىڭ وسى حاتىن اعامىزعا سىيلىق رەتىندە بەرىپ جىبەرمەكپىز. ءوزى "سوۆميندە" جاتىر ەكەن. "دۋلات اتا، اۋىرماڭىزشى"... بۇل بارشا قازاق بالالارىنىڭ، "ۇلاندى" وقيتىن پەرىشتە كوڭىلدەردىڭ تىلەگى" دەپ «ۇلان» گازەتىنىڭ ءجۋرناليستى جادىرا نارماحانوۆا №43 مەكتەپتىڭ 10-سىنىپ وقۋشىسى اقەركە سابىر قىزىنىڭ دۋلات يسابەكوۆكە جازعان جىلى لەبىزىن گازەتكە جاريالاپتى. قامشى پورتالى سىزدەرمەن دە ءبولىسۋدى ءجون كوردى. بۇل دۇنيەدە ادامدار اراسىندا ەستە قالاتىن نارسە بىر-بىرىنە دەگەن سىيلاستىق پەن جىلى لەبىز عانا ەمەس پە؟!

«جازعى دەمالىس جاقىنداعان كەزدە-اق، قانداي كىتاپ وقيمىن؟» دەگەن ويدا ءجۇردىم. مەكتەبىمىزدە ادەبي كەشتى ءجيى ۇيىمداستىراتىن مەكتەپ باسشىسى عاليا اپايعا، بارشا ۇستازدار قاۋىمىنا العىسىم شەكسىز. ۇستازدارىم مەنىڭ ويىمدى وقىپ قويعانداي، «مەكتەپكە جازۋشى دۋلات يسابەكوۆ كەلەدى» دەگەندە قاتتى قۋاندىم. بوس ۋاقىتىمدا جازۋشىنىڭ شىعارمالارىن وقىپ، تولعاندىرعان سۇراقتارىمدى قاعازعا ءتۇسىردىم. اسىرەسە، «گاۋھارتاس» ومىرگە دەگەن كوزقاراسىمدى وزگەرتتى. قىزىعا وقىعانىم سونشالىق، شىعارمانىڭ سوڭىنا دەيىن قالاي جەتكەنىمدى بىلمەي قالدىم.

ايتۋلى كۇندى اسىعا كۇتتىم. «دۋلات اتا قالاي جازۋشى بولدى؟»، «العاشقى شىعارماسى قانداي؟»، «بالا كۇنىندە كىم بولۋدى ارماندادى؟» دەگەن سۇراقتارىمدى جازىپ قويدىم. ءبىراق، قالامگەردى جاقىننان كورگەندە، قوبالجىدىم با، سۇراقتارىمنىڭ جارتىسى ۇمىت قالدى...اتامىزدىڭ اق باتاسىن الۋ ءۇشىن سىنىپتاستارىم ايانىپ قالمادى، ولەڭ ايتىپ، مىڭ بۇرالا بيلەدى. وكىنىشتىسى، دۋلات اعامىز ازداپ سىرقاتتانىپ قالىپتى. اڭگىمەمىز ۇزاققا سوزىلمادى.

ءقادىرلى دۋلات اعا، سىزگە بارشا مەكتەپ وقۋشىلارى اتىنان العىس ايتامىن. ءبىزدى بالاسىنباي، ۋاقىتىڭىزدى ءبولىپ، ءسوزىمىزدى تىڭداعانىڭىزعا راحمەت! زور دەنساۋلىق تىلەيمىن. قازاق ادەبيەتىنىڭ مارتەبەسىن اسقاقتاتا بەرىڭىز!..»

"قامشى" پورتالىنىڭ ۇجىمى دا دۋلات يسابەكوۆتى تۋعان كۇنىمەن قۇتتىقتايدى! اۋىرماڭىز، قالامىڭىز ۇشتالا بەرسىن!