تۇركياداعى رەسەيلىك ەلشى اندرەي كارلوۆتىڭ ولىمىنە مىڭداعان ادامدار كوڭىل ايتىپ، قايعىعا ورتاقتاستى. ونى حالىقتىڭ، كامەرانىڭ، جۋرناليستەر مەن كورمەگە كەلۋشىلەردىڭ، ايەلى مارينا ميحايلوۆنانىڭ الدىندا اتىپ ءولتىردى.
انكارادا رەسەي ەلشىلىگىنىڭ عيماراتى ورنالاسقان كوشەگە اندرەي كارلوۆتىڭ ەسىمى بەرىلەتىنى دە بەلگىلى.
«ولار، مارينا ميحايلوۆنا مەن اندرەي گەنناديەۆيچ وتە قاراپايىم، ءتاتۋ-تاتتى وتباسى بولعان.
ايەلىن قاتتى سىيلايتىن. اندرەي سىم-نەن جۇمىس ۋاقىتى بىتكەن سوڭ، ايەلىنە قوڭىراۋ شالادى. ولار مەترودا كەزدەسىپ، ۇيلەرىنە بىرگە قايتاتىن. ءدال سولاي تاڭەرتەڭ جۇمىستارىنا دا بىرگە بارادى. بەدەلدى قىزمەتىنە قاراماستان، قوعامدىق كولىكپەن ءجۇرىپ تۇراتىن. ول ۇنەمى بايلانىستا بولاتىن. بويىندا تاكاپپارلىقتىڭ ۇشقىنى دا جوق.
ايەلى مارينا ميحايلوۆنا دا تاماشا جان. ءبىز ۇنەمى اندرەي مىرزاعا جار تاڭداۋدا جولى بولعانىن ايتىپ جۇرەتىنبىز»، – دەيدى مارينا ميحايلوۆنا كارلوۆا جۇمىس ىستەيتىن ۋنيۆەرسيتەتتىڭ حالىقارالىق جۋرناليستيكا فاكۋلتەتىنىڭ دەكانى ياروسلاۆ لۆوۆيچ سكۆورسوۆ. – مارينا ميحايلوۆناعا كۇيەۋىنىڭ ءولىمى قالاي اۋىر تيگەنىن ويلاۋ ماعان وڭاي ەمەس. وسى كورمەدە ەكەۋىنىڭ بىرگە بولعانى دا تاڭ قالارلىق ەمەس. ولاردى بولەك ەلەستەتۋ مۇمكىن ەمەس ەدى.
قحدر-دا رەسەي ەلشىسى الەكساندر يۆانوۆيچ ماسەگورا فەيسبۋك پاراقشاسىندا جازبا قالدىرىپتى: «قوش بول، اندرەي.. مەن جازىپ وتىرىپ، كوز جاسىمدى تيا الار ەمەسپىن.
بۇگىن مەنىڭ دوسىم اندرەي كارلوۆ قايتىس بولدى. ونى تۋ سىرتىنان اتىپ ءولتىردى. كامەرانىڭ الدىندا ءولتىرىلدى. ول مەزەتتە جانىندا بولعان ايەلىنە دە حابارلاسىپ، بەكەم بولۋىن وتىندىك. ول: «اندرەي مەنىڭ كوزىمشە ءولتىرىلدى، ول جەردە جاتىر جانە مىنا ادام بىزگە قاسىنا بارۋىمىزعا رۇقسات بەرمەي جاتىر»، – دەدى.
قوش بول، اندرەي. سەنى جەرلەۋ راسىمىندە مارينا ەكەۋىڭ نەكەلەسكەن، ءوزىڭ قالاعان پحەنيان پراۆوسلاۆتىق شىركەۋدىڭ قوڭىراۋى سوعىلاتىن بولادى دەپ ۋادە بەرەمىن. قوش بول، دوسىم، باۋىرىم»، دەپ اياقتادى قوشتاسۋ حاتىن الەكساندر يۆانوۆيچ ماسەگورا.
