جۋىردا عانا اسا ءىرى كولەمدە پارا الدى دەگەن كۇدىكپەن باسشىلارى ۇستالعان "بايتەرەك Development" اكسيونەرلىك قوعامى قازاق ءتىلىن مەنسىنبەي وتىر. دالىرەك ايتساق، كومپانيانىڭ ينتەرنەت سايتىندا  اقپاراتتار رەسمي تىلدە تاپ-تۇيناقتاي ەتىپ  بەرىلگەن، ال مەملەكەتتىك تىلدەگى نۇسقاسىنداعى قاتەدەن كوز سۇرىنەدى. بۇل تۋرالى «قازاقستان» تەلەارناسىنىڭ جاڭالىقتار قىزمەتى حابارلاعان بولاتىن. "بايتەرەك" حولدينگىنە قاراستى اكسيونەرلىك قوعامنىڭ سايتىنداعى ماتىندەردى ايتپاعاندا نەگىزگى ايدارلاردىڭ ءوزى قاتەگە تولى. مىسالى «تابۋ» دەگەن ءسوزدى «توبۋ» دەپ اۋدارعان. سونداي-اق كومپانيانىڭ  باعىتى دەگەن بولىمدەگى قازاقشا ماتىندەردىڭ مۇلدە ماعىناسى جوق جانە تىلدىك ەرەجەنىڭ ەشبىرىنە كەلمەيدى.  مىسالى كومپانيانىڭ باعىتى.......... دەپ كورسەتىلگەن.

ۇلتتىق قۇندىلىقتارىمىزدى مەنسىنبەي وتىرعانداردىڭ ىشىندە ۇلتتىق حولدينگتەر دە بار. مىسالى «قازاگرو» مەن  «قازاگروقارجى» كومپانيالارىنىڭ رەسمي ينتەرنەت رەسۋرستارىندا نەسيە بەرۋگە قاتىستى اقپاراتتار تەك ورىس تىلىندە. اۋىلدارداعى قازاق ءتىلدى شارۋالارمەن تىكەلەي جۇمىس ىستەيتىن كومپانيالار ءۇشىن بۇل ۇلكەن سىن ەكەنى ايتىلعان. مەملەكەتتىك ءتىلدى مەنسىنبەي وتىرعان تاعى ءبىر كومپانيا رەتىندە «كاسىپقور» حولدينگى دە اتالعان. كومپانيا تۋرالى اقپاراتتى قازاق تىلىندە بىلگىڭىز كەلسە، ورىس تىلىندە وقۋعا ءماجبۇر بولاسىز دەلىنگەن بەينەسيۋجەتتە.

ەڭ قىزىعى، پروكۋراتۋرا ماماندارىنىڭ سوزىنشە ۇلتتىق كومپانيالار مەن كۆازيمەملەكەتتىك كومپانيالاردىڭ رەسمي سايتتارىنىڭ مەملەكەتتىك تىلدەگى مازمۇنى ەشقانداي زاڭمەن رەتتەلمەگەن. ءتىل تۋرالى زاڭدا تەك مەملەكەتتىك ورگانداردىڭ ينتەرنەت رەسۋرستارى تۋرالى كورسەتلىگەن. دەگەمەن ماتەريالدا كوتەرىلگەن ماسەلەنى قالالىق پروكۋراتۋرا قاتاڭ قاداعالاۋعا الاتىنىن ايتقان.