قازاقستان ديپلوماتتارى كورەيالىق جۇمىس بەرۋشىنى سول ەلدە قايتىس بولعان وتانداسىمىزدىڭ تۋىستارىنا وتەماقى تولەۋگە ءماجبۇر ەتتى دەپ حابارلايدى 24.kz.

قاراجات جاقىن ارادا الماتىدا تۇرعان مارقۇمنىڭ وتباسىنىڭ شوتىنا اۋدارىلادى. سونداي-اق سەۋلدەگى قازاقستان ەلشىلىگى جۇمىس بەرۋشىنىڭ زاڭسىز ەڭبەك ەتكەن قىزمەتكەرگە وتەماقى تولەۋى وتە سيرەك بولاتىن جاعداي ەكەندىگىنەن حاباردار ەتتى.

 قازاقستان ازاماتى كەڭەس شۇكىربايەۆ سەۋلدەن 120 شاقىرىم جەردە ورنالاسقان سوسان قالاسىندا جۇمىس ىستەگەن. ول كورەياعا ءبىر ايعا ساياحاتتاپ كەلىپ، كەيىن جۇمىس ىستەۋگە قالعان ەكەن. مىنا سۋرەت كەڭەستىڭ قايتىس بولعان كۇنى ءتۇسىرىلىپتى. ول جالعىز تۇرعان. دوستارىنىڭ ايتۋىنشا، مارقۇم شەتەلدە جۇمىس ىستەگەن 4 ايدىڭ ىشىندە جيىرما كەلىگە ارىقتاعان. اقشاسىن ۇنەمدەپ، الماتىداعى وتباسىنا كوبىرەك جىبەرىپ وتىرعان. اياقاستى ولىمگە جارىتىپ تاماق ىشپەۋى دە سەبەپ بولۋى مۇمكىن. ونىڭ ۇستىنە كورەيانىڭ جازى دا ىستىق.

شۇكىربايەۆا مەيرامكۇل، كەڭەس شۇكىربايەۆتىڭ جەسىرى «قاسىمىزدا جۇرسە، مۇمكىن باسقاشا بولار ما ەدى؟! ول جەرگە بارعاننان كەيىن ساعىنىش بولدى ما؟! ايتەۋىر جۇرەگى بىردەن توقتادى.

ەرجان امۋرتايەۆ، ق ر ەلشىلىگىنىڭ كورەيا رەسپۋبليكاسىنداعى ءبىرىنشى حاتشىسى: «قازاقستان ەلشىلىگىنىڭ رەسمي شارالارى، سونىڭ ىشىندە كورەيا پوليسياسىنان، دەنساۋلىق ساقتاۋ ورگاندارىنان الىنعان قۇجاتتار نەگىزىندە ازاماتىمىزدىڭ ولىمىنە دەنساۋلىعىنىڭ ناشارلاۋى سەبەپ بولعانى انىقتالدى. اۋىر جاعدايدا جۇمىس ىستەگەننەن ونىڭ جۇرەگى قيىندىقتى كوتەرە الماعان. كورەيادا جۇمىستىڭ لاس، ءقاۋىپتى جانە اۋىر ءتۇرى بار. ادەتتە كورەيا رەسپۋبليكاسىنىڭ ازاماتتارى مۇنداي جۇمىستاردىڭ ءبىرىن دە ىستەمەيدى».

كەڭەس قۇرىلىستا ءجۇرىپ جۇرگىزۋشى دە بولدى. تاس تا قالادى. جۇك تە تاسىدى. تۇسكى ۇزىلىستە ءوزىن جايسىز سەزىنىپ، دوستارى جەدەل جاردەم شاقىرعان، ءبىراق دارىگەرلەر كومەكتەسە المادى. جۇمىس بەرۋشى كەڭەستىڭ ءمايىتىن الماتىعا جىبەرۋ شىعىندارىن ءوز موينىنا الىپ، وتباسىنا تولەماقى وتەۋگە كەلىستى.

چونگ سىنگ كيۋ، قۇرىلىس كومپانيانىڭ باسشىسى: «مەن كومەكتەسۋگە بىردەن كەلىستىم، سەبەبى مەنىڭ دە اكەم شەتەلدە جۇمىس ىستەپ ءجۇرىپ قايتىس بولعان. سول جاقتا ونىڭ ءمايىتىن ورتەپ، بىزگە تەك كۇلىن اكەلىپ بەردى. بۇل وقيعا بالا كەزىمنەن ەستە قالدى. سوندىقتان تۋىستار ونىمەن ويداعىداي قوشتاسقانىن قالاپ، ازعانتاي اقشا جىبەردىم، سەبەبى وتباسى اسىراۋشىسىنان ايىرىلدى عوي».

 شۇكىربايەۆا مەيرامكۇل، كەڭەس شۇكىربايەۆتىڭ جەسىرى: «ۇشاققا ۇشقانىڭ ءوزى 3،5 مىڭ دوللار دەدى. بالزامداۋى 7 مىڭ دەپ ايتتى. 35-40 مىڭ كەتتى دەپ ويلايمىز».

كەڭەس شۇكىربايەۆتىڭ ارتىندا 3 بالاسى مەن 2 نەمەرەسى قالدى.

مەيرامكۇل وسى اۋىر قازادان كەيىن تۋما-تۋىس، جاقىندارىن شەتەلگە جىبەرگىسى جوق.