قىرعىزستان پرەزيدەنتى المازبەك اتامبايەۆ جەلتوقساننىڭ 24ء-ى كۇنى وزبەكستاننىڭ سامارقان قالاسىنا جۇمىس ساپارىمەن باردى دەپ حابارلايدى «قامشى» پورتالى قىرعىز پرەزيدەنتى سايتىنا سىلتەمە جاساپ. وزبەكستان پرەزيدەنتى بولىپ سايلانعاننان كەيىن وزبەكستانعا العاشقى شەتەل باسشى بولىپ قىرعىزستان پرەزيدەنتى المازبەك اتامبايەۆ كەلدى.
قىرعىزستان پرەزيدەنتى المازبەك اتامبايەۆ وزبەكستانعا جۇمىس ساپارى بارىسىندا وسى ەلدىڭ العاشقى پرەزيدەنتى يسلام كارىموۆتىڭ زيراتىنا دا باردى.
سامارقاندتا وتكەن كەلىسسوزدەر بارىسىندا وزبەكستان مەن قىرعىزستان پرەزيدەنتتەرى ەكىجاقتى كەلىسىم ماسەلەلەرىن تالقىلادى. كەزدەسۋ بارىسىندا ميرزيويەۆ وزبەكستان مەن قىرعىزستان اراسىنداعى بايلانىستاردى نىعايتۋ قاجەتتىلىكتەرىن اتاپ ءوتتى. سونىمەن قاتار وزبەكستان پرەزيدەنتى ەكى ەلدىڭ ساۋدا-ەكونوميكالىق كەلىسىم مۇمكىندىكتەرىنىڭ زور ەكەنىن ايتتى.
ءوز كەزەگىندە اتامبايەۆ وزبەكستان مەن قىرعىزستان تاريحى ورتاق ەلدەر ەكەنىن جەتكىزدى.
ايتا كەتسەك، يسلام كاريموۆتىڭ قازاسىنان كەيىن وزبەك ەلى باسشىلىعىنا كەلگەن ميرزيويەۆ قىرعىز دەلەگاتتارىمەن كەزدەسۋ وتكىزىپ، شيرەك عاسىر بويى شەشىلمەي كەلە جاتقان شەكارا داۋىنىڭ ءبىرازىن شەشكەن ەدى.
ميرزيويەۆ 4 جەلتوقسان كۇنى وتكەن سايلاۋدا باسىم داۋىسپەن جەڭىسكە جەتىپ، تاۋەلسىز وزبەكستاننىڭ پرەزيدەنتى بولىپ سايلاندى. الدىن الا بولجام بويىنشا العاشقى رەسمي ساپارىن قازاقستانعا، رەسەيگە جاساۋى مۇمكىن.
