تۇركىستان قالاسى اكىمدىگىنىڭ ءماجىلىس زالىندا قالا اكىمى الىپبەك وسەربايەۆتىڭ ءتوراعالىق ەتۋىمەن تۇركىستان قالاسى بويىنشا قىلمىستىڭ الدىن الۋ شارالارىنىڭ بارىسى جانە مال ۇرلىعىنا ناتيجەلى توسقاۋىل قويۋ ماسەلەلەرى قارالدى. جيىنعا اۋىل وكرۋگ اكىمدەرى مەن تۇرعىندارى، سونىمەن قاتار ءتيىستى سالا قىزمەتكەرلەرى قاتىستى. 

ءقىىب جەرگىلىكتى پوليسيا قىزمەتى ۋچاسكەلىك پوليسيا بولىمشەسىنىڭ باسشىسى باۋىرجان يسايەۆ اتالمىش ماسەلەلەر بويىنشا حابارلاما جاسادى. بابايقورعان اۋىلدىق وكرۋگىنىڭ اكىمى ارمان ەرجىگىتوۆ، ءۇشقايىق اۋىلدىق وكرۋگىنىڭ اكىمى ءنۇرالى المەردەنوۆ، ۆەتەريناريا ءبولىمىنىڭ باسشىسى پولات مۇسايەۆ، زاڭ ءبولىمىنىڭ باس ينسپەكتورى ءبىرجان بەكدىلدايەۆ قوسىمشا حابارلامالار جاساپ، اتالعان قىلمىستارىڭ الدىن الۋ، بولدىرماۋ تۇرعىسىندا ءوز تاراپتارىنان قانداي جۇمىستار جاسالىپ جاتقانىنا توقتالدى.

ءتورت تۇلىكتىڭ ۇرلىعىنا قاتىستى اتالمىش جيىنعا كەلگەن اۋىل تۇرعىندارى ۇرلىقتى توقتاتۋدىڭ، ونى قۇرىقتاۋدىڭ جولدارىن بىرلەسە شەشۋ قاجەتتىگىن جەتكىزدى. سونىمەن قاتار مال ۇرلىعىنىڭ جيىلەۋىنىڭ باستى سەبەبى باقتاشىنىڭ بولماۋى ەكەنىن دە ايتتى.

«مال اشۋى – جان اشۋى» دەمەكشى، ءتورت تۇلىگى قولدى بولىپ، شىعىنعا ۇشىراپ جاتقان اۋىل تۇرعىندارىنىڭ جانايقايى كىمدى دە بولسىن بەي-جاي قالدىرماسى انىق. 

جيىن سوڭىندا شاھار باسشىسى الىپبەك وسەربايەۆ قايتالانا بەرەتىن مال ۇرلىعىنا ناتيجەلى توسقاۋىل قويۋ قاجەتتىگىن باسا ايتىپ، ناقتى تاپسىرمالار بەرە كەلە، مال ۇرلىعىنىڭ اشىلۋى بارىسىنداعى جۇمىستاردى سىنعا الىپ، ودان ناتيجە شىعارۋلارى قاجەتتىگىن دە نازاردان تىس قالدىرمادى.