قازاقستاندىق كاسىپقوي بوكسشى قانات يسلام ءوزىنىڭ كەزەكتى، 18ء-شى جەكپە-جەگىن 7 تامىز كۇنى كولۋمبيانىڭ باررانكيليادا قالاسىندا وتكىزەدى، - دەپ حابارلايدى Tengrinews.kz ءتىلشىسى.

وتانداسىمىزدىڭ كەلەسى قارسىلاسى كولۋمبيالىق فيدەل مانتەرروسا بولماق. فيدەل وسى ۋاقىتقا دەيىن كاسىپقوي بوكستىڭ شارشى الاڭىنا 43 مارتە شىعىپ، 32 كەزدەسۋىندە جەڭىسكە جەتسە، 9 كەزدەسۋىندە جەڭىلىپ، 1 كەزدەسۋدە تەڭ تۇسكەن. 26 رەت ول كەزدەسۋدە ۋاقىتىنان بۇرىن اياقتاعان.

ال قانات يسلام بولسا قازىرگە دەيىن 17 كەزدەسۋ وتكىزىپ، بارلىعىندا جەڭىسكە جەتكەن. وتانداسىمىز ءوزىنىڭ 14 كەزدەسۋىندە قارسىلاسىن نوكاۋتقا جىبەرگەن. استانا ۋاقىتىمەن تاڭعى 08.00-دە باستالاتىن بۇل جەكپە-جەكتى جەرگىلىكتى ارنالاردىڭ ءبىرى تىكەلەي تاراتادى.

ەسكە سالايىق، وتانداسىمىز ءوزىنىڭ سوڭعى جەكپە-جەگىن مامىر ايىندا كولۋمبيالىق فرانسيسكو كوردەروعا قارسى وتكىزىپ، كەزدەسۋدىڭ ءۇشىنشى راۋندىندا جەڭىسكە جەتتى. بۇل جەڭىسىنىڭ ارقاسىندا قانات بۇكىلالەمدىك بوكس قاۋىمداستىعىنىڭ (WBA) مامىر ايىنداعى رەيتينگى بويىنشا 11-ساتىدان 9-ورىنعا كوتەرىلدى. ال Boxrec.com پورتالى قازاقستاندىق بوكسشىنى الەمدەگى ەڭ قارقىندى بوكسشىلاردىڭ تىزىمىنە قوستى.

ايتا كەتەيىك، قانات يسلام 1984 جىلى 13 قىركۇيەكتە قىتايدا دۇنيەگە كەلگەن. 2010 جىلى ول قازاقستانعا كوشىپ كەلگەن. كەيبىر دەرەكتەر بويىنشا، ول ءقازىر الماتى وبلىسىنىڭ قاراساي اۋدانىندا تۇرىپ جاتىر.

ول كاسىپقوي بوكسقا 2012 جىلى اۋىستى. بۇعان دەيىن قانات اۋەسقوي بوكستا جۇڭگو اتىنان بەيجىڭ وليمپياداسىنا قاتىسىپ، قولا مەدال العان ەدى. ەلگە ورالعان سوڭ WSB سەرياسىندا ونەر كورسەتەتىن ەلوردالىق "استانا ارلاندارى" كومانداسىنىڭ نامىسىن قورعادى. بۇگىندە بوكسشى اقش-تىڭ فلوريدا شتاتىنداعى Pahokee بازاسىندا دايىندالىپ ءجۇر. Tengrinews.kz

(اۋەلگى تاقىرىپ: قانات يسلام كەلەسى جەكپە-جەگىن كولۋمبيالىق بوكسشىعا قارسى وتكىزەدى)