شقو-دا پروكۋراتۋرا قىزمەتكەرى Instagram جەلىسىندە جىلدامدىقتى اسىرىپ كەلە جاتقانى تۇسىرىلگەن ۆيدەومەن ماقتاندى. قولدانۋشىلاردىڭ ايتۋىنشا، جىلدامدىقتى اسىرعان پروكۋراتۋرا قىزمەتكەرى تۇسكەن روليكتى جەلىگە شىعىس قازاقستان وبلىستىق پروكۋراتۋرا قىزمەتكەرلەرىنىڭ ءوزى جۇكتەگەن، - دەپ حابارلايدى Tengrinews.kz ءتىلشىسى اۆتوموبيليستەرگە جاردەمدەسۋ (وسا) قوعامىنىڭ سايتىنا سىلتەمە جاساپ.
ۆيدەو اۆتوموبيليستەرگە جاردەمدەسۋ (وسا) قوعامىنىڭ سايتىندا جاريالانعان. "شقو پروكۋراتۋراسىنىڭ تەرگەۋشىسى ەركەبۇلان قۇدابايەۆ Instagram جەلىسىندەگى پاراقشاسىندا جىلدامدىقتى اسىرىپ كەلە جاتقانى تۇسىرىلگەن ۆيدەومەن ماقتانىپ، پاراقشاسىنا جۇكتەگەن"، - دەپ جازعان قولدانۋشى الەۋمەتتىك جەلىلەردە جاريالانعان روليكتىڭ سيپاتتاماسىنا.

ايتا كەتەيىك، ۆيدەودا جۇرگىزۋشىنىڭ تاسجولدا ساعاتىنا 220 شاقىرىممەن كەلە جاتقانى كورىنەدى. ال ۆيدەوداعى كەلەسى كادرلار وسكەمەن قالاسىندا تۇسىرىلگەن. وندا دا جۇرگىزۋشى جىلدامدىقتى اسىرىپ، ساعاتىنا 90 شاقىرىممەن كەلە جاتادى.

ءبىراق بۇل ۆيدەولاردىڭ قاشان تۇسىرىلگەنى بەلگىسىز.
جىلدامدىقتى اسىرعان جۇرگىزۋشى تۇسىرىلگەن ۆيدەو جەلىدە جاريالانعان سوڭ، ەركەبۇلان قۇدابايەۆ Instagram جەلىسىندەگى پاراقشاسىنا شەكتەۋ قويدى. ال شقو پروكۋراتۋراسىنداعىلار Tengrinews.kz تىلشىسىنە الەۋمەتتىك جەلىلەردە تارالىپ جاتقان ۆيدەو جايلى بىلەتىندەرىن ايتتى.

"ءقازىر ۆيدەوماتەريالدار زەرتتەلىپ جاتىر. قىزمەتكەرگە قاتىستى قانداي دا ءبىر ناقتى شەشىم قابىلداۋعا ءالى ەرتە. تەرگەۋ جۇرگىزىلەدى"، - دەدى شقو پروكۋراتۋراسىنىڭ باسپا ءسوز قىزمەتىندەگىلەر.