سىبايلاس جەمقورلىققا قارسى ءىس-قيمىل ۇلتتىق بيۋروسى وكىلدەرى "بايتەرەك ۇبح" باسقارما ءتوراعاسى قۋاندىق بيشىمبايەۆتىڭ قىزىلوردا قالاسىنداعى شىنى زاۋىتىنىڭ قۇرىلىسىنا بولىنگەن 1 ميلليارد تەڭگە قاراجاتتى جىمقىرعانىن مالىمدەدى، - دەپ حابارلايدى Tengrinews.kz ءتىلشىسى.
"بايتەرەك ۇبح" باسقارما ءتوراعاسى قۋاندىق بيشىمبايەۆ قىزىلوردا قالاسىندا تاباق شىنى ءوندىرۋ جانە قايتا وڭدەۋ زاۋىتىنىڭ قۇرىلىسىندا "Orda Glass" ج ش س جانە ونىڭ مەردىگەر ۇيىمى "شىمكەنتحيممونتاج" ج ش س ارقىلى 1 ميلليارد تەڭگە جىمقىرۋ بويىنشا قىلمىستىق جوسپار قۇرعان. قىلمىستىق جوسپارعا وسى اتالعان ۇيىمداردىڭ جەتەكشىلەرى د.يبراشيەۆ ، ج.يسابەك جانە م.كوجابايەۆ تارتىلعان"، - دەلىنگەن حابارلامادا.
جىمقىرىلعان قاراجات، ۇلتتىق بيۋروداعىلاردىڭ ايتۋىنشا، "زاۆود سترويتەلنىح مەتاللوكونسترۋكسيي" ج ش س ۇلەستەس كومپانياسى ارقىلى تاماقتانۋعا جانە جۇمىسشىلاردىڭ جاتىن ورنىنا دەپ قولما-قول اقشاعا اينالدىرىلعان.
وسى كورسەتىلگەن سومادان قۋاندىق بيشىمبايەۆ جەكە ءوزى 2 ميلليون اقش دوللارىن سىيبايلاسى - ءىنىسى س.نۇرلىبەكتەن العان دەلىنەدى.
ايتا كەتەيىك، بيشىمبايەۆتىڭ ۇستالعانى جايلى 2017 جىلدىڭ 10 قاڭتارىندا بەلگىلى بولعان ەدى. "بيشىمبايەۆ توپ بولىپ، الدىن الا كەلىسىم جاساۋ ارقىلى اسا ءىرى كولەمدە بىرنەشە رەت پارا الىپ وتىرعان. زاڭسىز العان قاراجاتتى بيشىمبايەۆ ءوز قاجەتىنە جاراتقان"، - دەپ حابارلاعان ەدى انتيكوررۋپسيا قىزمەتىنىڭ وكىلدەرى.
