پاكىستان استاناسى يسلامابادتىڭ جوعارعى سوتى اۋليە ۆالەنتين كۇنىن مۇسىلمان مادەنيەتىنە قايشى كەلەدى دەپ تانىپ، قالادا مەرەكەنى تويلاۋعا تيىم سالدى. بۇل تۋرالى BBCء-دىڭ ورىس قىزمەتى حابارلادى.

سوت قوعامدىق ورىندار مەن مەملەكەتتىك مەكەمەلەردە مەرەكەگە ارنالعان ءىس-شارالار وتكىزۋگە تيىم سالعان. سونداي-اق ب ا ق وكىلدەرىنە دە «عاشىقتار كۇنىنە» قاتىستى قانداي دا ءبىر وقيعانى بايانداۋعا نەمەسە جارنامالاۋعا رۇقسات بەرىلمەيدى.

سوت بۇل شەشىمدى اۋليە ۆالەنتين كۇنىن تويلاۋدىڭ يسلام ىلىمىنە قايشى كەلەتىنى تۋرالى جازىلعان پەتيسيادان كەيىن قابىلداعان. The Dawn گازەتىنىڭ اقپارىنشا، پەتيسيادا «عاشىقتار كۇنىنە» ارنالعان ءىس-شارالاردىڭ ادامگەرشىلىككە جات كوزقاراس پەن ورىنسىز مىنەز-قۇلىقتىڭ تارالۋىنا اپاراتىنى ايتىلعان.

سوڭعى جىلدارى بۇل مەرەكە پاكىستاندا كەڭىنەن تارالا باستادى. اۋليە ۆالەنتين كۇنىن ەلدىڭ ءىرى قالالارى ەرەكشە بەلسەندىلىكپەن تويلاۋدا. ءبىراق، كوپتەگەن ءدىني توپتار وعان قارسى پىكىرلەرىن بىلدىرگەن.

ءبىر جىل بۇرىن ەل پرەزيدەنتى مامنۋن حۋسەين اۋليە ۆالەنتين كۇنىن تويلاۋدان اۋلاق بولۋ كەرەكتىگىن، سەبەبى، بۇل مەرەكە پاكىستان مادەنيەتىنە سايكەس كەلمەيتىنىن مالىمدەگەن بولاتىن.

بيىل كوحات قالاسىندا 14-اقپانعا اشىق حاتتار مەن مەرەكەلىك تاۋارلار ساتۋعا تيىم سالىندى. سونداي-اق پەشاۆار قالاسىندا مەرەكەنى تويلاۋعا رۇقسات بەرىلمەدى. كەيىنىرەك ەكى قالانىڭ دا بيلىك وكىلدەرى تيىم سالۋ تۋرالى حابارلامانىڭ ەسكەرىلمەگەنىن ءمالىم ەتكەن.