ينستاگرام جەلىسىندە 3،7 ميلليون وقىرمانى بار تۇرىك اسپازى نۋسرەت گوكچە الەمگە تانىلدى دەپ جازادى massaget.kz. جالپاق جۇرتتىڭ نازارىنا ىلىككەن ارەكەت – تۇرىك اسپازىنىڭ وزىنە عانا ءتان ەت تۋراپ، تۇز سەبۋ ءادىسى. ەت تۋراۋعا ونەر رەتىندە قاراپ، وڭ قولىمەن ەففەكت بەرىپ تۇز سەبەتىن جىگىت – ناعىز ءارتىس سەكىلدى. 

نۋسرەت 1983 جىلى تۇركيانىڭ سولتۇستىك-شىعىسىنداعى ەرزۋرۋم قالاسىندا دۇنيەگە كەلگەن. كوپبالالى، كەدەي وتباسىندا تۋعان نۋسرەتتىڭ اكەسى قاراپايىم شاحتەر بولعان. اتا-اناسى وقۋىنىڭ اقىسىن تولەپ بەرە الماعاندىقتان، ورتا مەكتەپتى دە اياقتاماي، وقۋدان شىعىپ قالعان تۇرىك جىگىتى بۇگىندە تابىستى بيزنەسمەنگە اينالدى. جۇلدىزىن ينستاگرام جەلىسى جاققان جىگىت جەتىستىككە جەتۋ جولىندا كۇنىنە 18 ساعات تىنىمسىز ەڭبەك ەتكەن. ارگەنتينادا بىرنەشە جىل جۇمىس ىستەپ، ەت ءپىسىرۋدىڭ قۇپياسىنا قانىققان.

ءاتى-جونى برەندكە اينالعان نۋسر ەت بۇگىندە تۇركيانىڭ بىرنەشە قالاسىنان، ابۋ-دابي مەن دۋبايدان ءوزىنىڭ ستەيك-حاۋسىن اشقان. ول – اسپازدىق سالاسىندا الەمگە تانىلعان تۇلعا، ىقپالدى تۇلعالار مويىنداعان كاسىبي مامان يەسى. ونىڭ مەيرامحاناسىنا لەوناردو دي كاپريو، انتونيو باندەراس، فلويد مەيۆەزەر سياقتى كوپتەگەن جۇلدىز كەلىپ قوناق بولادى. ال رياننا مەن بەن اففلەك گوكچەنىڭ اۆتورلىق قيمىلى بەينەلەنگەن جەيدە كيىپ شىقتى. 

ابۋ-دابيدە مىناداي ستريت-ارت سالىندى. 

امەريكالىق تەلەارنالار تۇرىك جىگىتىنىڭ تانىمالدىعىنا قايران قالىپ، ول تۋرالى سيۋجەت كورسەتتى. ونىڭ تاماققا دەگەن ەرەكشە كوزقاراسى، اسپازدىق سالاسىنا دەگەن ايرىقشا ماحابباتى وعان اتاق پەن داۋلەت اكەلدى. ول ەت ءپىسىرۋ ءتاسىلىن شەبەر مەڭگەرگەن. سونداي-اق تارتىمدى سىرتقى كەلبەتى دە نۋسرەتتى اسپازدار اراسىنان ەرەكشەلەپ تۇر. 

ينستاگرام جەلىسىندە نۋسرەتكە تاڭىرقاعان جاندار #SaltBae حەشتەگىمەن اسپازعا ارناپ جىلى لەبىز بىلدىرۋدە. جۇمىسقا ىستىق ىقىلاسپەن كىرىسۋ كەز كەلگەن ادامدى جەتىستىككە  جەتەلەيتىنىن دالەلدەگەن تۇرىك جىگىتى كوپكە ۇلگى بولىپ ءجۇر.