ىستامبۇلداعى «رەينا» تۇنگى كلۋبىنا جاسالعان شابۋىلدى جوسپارلاعان فرانسيا ازاماتى ۇستالدى. بۇل تۋرالى 24.kz حابارلايدى.
قاندى شابۋىلدى جوسپارلاعان كۇدىكتىنىڭ ۇلتى تۇرىك، بۇعان دەيىن ول انتاليادا تۇرىپ كەلگەن. ال 2009 جىلدان باستاپ فرانسياعا قونىس اۋدارعاندىعى بەلگىلى بولدى. ارنايى وپەراسيا بارىسىندا كۇدىكتى ىستامبۇلدا قۇرىقتالىپ وتىر.
ەستەرىڭىزگە سالا كەتەيىك، جاڭا جىل ءتۇنى ىستامبۇلداعى «رەينا» تۇنگى كلۋبىنا قارۋلى شابۋىل جاسالىپ، 39 ادام قۇربان بولعان ەدى. لاڭكەس كالاشنيكوۆ اۆتوماتىنان وق جاۋدىرعان. ال بۇل شابۋىلدى «يراك پەن ليەۆانت لاڭكەستىك توبى» ءوز موينىنا العان بولاتىن. 39 ادامدى جەر جاستاندىرعان لاڭكەس ابدۋلگادير ماشاريپوۆ قۇرىقتالعان ەدى.
