اقوردادا ەلباسىنىڭ قاتىسۋىمەن قاۋىپسىزدىك كەڭەسىنىڭ وتىرىسى ءوتتى.
ەلباسى نۇرسۇلتان نازاربايەۆ قازاقستان حالقىنىڭ جانە ءوز اتىنان اسكەري جاتتىعۋدى ورىنداۋ بارىسىندا قازا تاپقان 7 اسكەري قىزمەتكەردىڭ وتباسى، تۋعان-تۋىستارىنا كوڭىل ايتتى. بۇل تۋرالى قامشى پورتالى akorda.kz سايتىنا سىلتەمە جاساپ حابارلايدى.
- جامبىل وبلىسىندا قار كوشكىنى سالدارىنان بولعان قايعىلى وقيعا تۋرالى حاباردى زور كۇيزەلىسپەن قابىلدادىم. ولاردىڭ ءارقايسىسى ەلىنىڭ ناعىز پاتريوتى بولىپ، ءوز اسكەري مىندەتىن سوڭىنا دەيىن اتقاردى. قورعانىس مينيسترلىگىنە قازا تاپقان ساربازداردىڭ وتباسىلارىنىڭ بارىنە جان-جاقتى كومەك پەن قولداۋ كورسەتۋدى تاپسىرامىن. مەملەكەتتىك كوميسسيا بولعان وقيعانىڭ سەبەپتەرىن انىقتاۋدا. مۇنداي قايعىلى جاعداي بولاشاقتا قايتالانباۋ ءۇشىن بارلىق قاجەتتى شارالاردى قابىلدايمىز، - دەدى قازاقستان پرەزيدەنتى نۇرسۇلتان نازاربايەۆ.
بۇدان بولەك، جينالىستا قاۋىپسىزدىك كەڭەسىنىڭ كۇن تارتىبىنە شىعارىلعان ماسەلەلەر جايىندا ايتىلدى. قازىرگى كەزدە ەل ءۇشىن اسا ءقاۋىپتى بولىپ تۇرعان ەكسترەميستىك جانە تەرروريستىك ارەكەتتەرگە قارسى تۇرۋ ەڭ اۋەلگى مىندەت بولىپ تابىلاتىنىن ايتتى.
سونداي-اق، مەملەكەت باسشىسى مەملەكەتتىك ورگاندارعا باسقا دا سالالار مەن باعىتتارعا قاتىستى ۇلتتىق قاۋىپسىزدىكتى قامتاماسىز ەتۋ جونىندە ءبىرقاتار مىندەت قويدى.
