"قامشى" پورتالى ۇنەمى الەۋمەتتىك ماسەلەلەردى كوتەرۋمەن كەلەدى. وسى ورايدا nekhabar.kz پورتالىندا ءبىر اپتا بۇرىن جاريالانعان اقپاراتتى نازارلارىڭىزعا ۇسىنامىز.

اتىراۋدا نۇرسۇلتان مەن سارا، دىنمۇحاممەد پەن يمانعالي جانە قاسىمجومارت جوقشىلىقتا ءومىر ءسۇرىپ جاتىر. قالا ماڭىنداعى گەولوگ اۋىلىندا تۇراتىن راحمانوۆتار وتباسىنىڭ 3 جىل بۇرىن باسپاناسى ورتەنىپ كەتكەن. ءورتتىڭ كەسىرىنەن ءومىر بويى جيعان-تەرگەنىنەن، قۇجاتتارىنان ايرىلعان وتباسى نەسيە الىپ، شاعىن ءۇي كوتەرىپتى. ءبىراق، قارجىنىڭ جوقتىعىنان ءقازىر ءىشى-سىرتى تولىق بىتپەگەن، سۋىق ۇيدە تۇرۋعا ءماجبۇر. ال، ۇنەمى بۇرسەڭ قاعىپ جۇرەتىن بالالار بولسا، تويا تاماق جەپ، جىپ-جىلى ۇيدە تۇرۋدى ارماندايدى.

ەلگە بەلگىلى تۇلعالاردىڭ ەسىمدەرىن يەلەنگەن – ەگىزدەر نۇرسۇلتان مەن سارا، دىنمۇحاممەد پەن يمانعالي جانە قاسىمجومارت كۇنى-تۇنى ۇستەرىنەن قابات-قابات كيىمدەرىن تاستامايدى. ويتكەنى، جارتىلاي بىتپەگەن باسپانا جىلۋدى دا ۇستاپ جارىتپاي تۇر. ونىڭ ۇستىنە بالالار جارىتىپ تاماق تا ىشپەيدى. مەملەكەتتەن الاتىن 17 000 تەڭگە جاردەماقى مەن وتاعاسىنىڭ ءتۇرلى جۇمىس ىستەپ تاباتىن تابىسى دا 7 ادامدىق جانۇياعا جۇق بولار ەمەس. وتاعاسى بەرىك راحمانوۆتىڭ ماماندىعى قۇرىلىسشى. ول دا جۇمىس ورنىندا قىسقارتۋعا ۇشىراپ، ءقازىر اركىمنىڭ جۇمىسىن جاساپ، ازدى-كوپتى تابىس تاۋىپ ءجۇر. ال، وتاناسى ميرا قوجانازاروۆا ۇيدەن ءتاتتى توقاش، تورت ءپىسىرىپ ساتىپ، اس-سۋىن ايىرىپ وتىر.

- جۇرتتىڭ بالالارى استاناعا بارعىم كەلەدى، سامولەتپەن ۇشقىم كەلەدى دەپ ارماندايدى عوي، مەنىڭ بالالارىمنىڭ ارمانى – جىلى جەردە وتىرۋ، ءبىر كۇن بولسا دا جىلى جەردە وتىرىپ، شاي ىشسەك دەپ ارماندايدى. مەن سول جىلىلىق جاعىنان كومەكتەسەتىن ازاماتتار بولسا سولاردان كومەك سۇرايمىن، - دەيدى وتاناسى ميرا قوجانازاروۆا.

جارتىلاي ءبىتىپ تۇرعان ۇيدەگى ەسكى-قۇسقى جيhاز بەن كيىم-كەشەكتى كورشى-كولەم مەن وزگە دە قايىرىمدى جاندار تاۋىپ بەرىپتى. ال، ءبىر كاسىپكەر ءبىر جىل بويى ازىق-تۇلىكپەن قامتاماسىز ەتىپ كەلگەن ەكەن. ول دا بيىلدان باستاپ توقتاپ قالعان. ال، گەولوگ سەلولىق وكرۋگى اكىمىنىڭ ورىنباسارى جاندوس شادانوۆتىڭ ايتۋىنشا، اكىمدىكتىڭ ۇيىمداستىرۋىمەن كاسىپكەرلەر ءۇيدىڭ ەسىك-تەرەزەسىن وزگە دە قۇرىلىس ماتەريالدارىن الىپ بەرىپتى. ءبىراق، اكىمدىكتىڭ بۇل وتباسىعا ءوز بەتتەرىنشە كومەك كورسەتۋگە شامالارى جەتپەيتىن كورىنەدى. جانە ول ءۇشىن مەملەكەت تاراپىنان دا قاراجات قاراستىرىلماعان ەكەن.

ءورت كەزىندە بۇل وتباسىنىڭ قۇجاتتارى دا بىرگە كەتكەن. ءقازىر تەك وتاعاسى عانا قۇجاتىن قايتا راسىمدەپتى. ال، ونىڭ ايەلى مەن 5 بالانىڭ قۇجاتتارى ءالى كۇنگە دەيىن جاسالماپتى. ايتۋلارىنشا، ول ءۇشىن بۇرىن وزدەرى تۇرعان يندەر اۋدانىنا بارىپ قايتۋ كەرەك ەكەن. ءبىراق، وعان دا جولاقى تابا الماي وتىر.

ايىم تاسبولات