ءبىر عاسىرلىق تاريحى بار «جاس الاش» گازەتىنىڭ باس رەداكتورى اياق استىنان اۋىسىپ كەتتى. گازەتتى بىرنەشە ۋاقىت باسقارىپ كەلگەن رىسبەك سارسەنبايدىڭ ورنىنا ونىڭ ۇلى – نۇرلان سارسەنباي تاعايىندالدى.

رىسبەك سارسەنبايدىڭ ايتۋىنشا، بۇگىننەن باستاپ ول بۇل قىزمەتتەن شەتتەتىلىپتى.

 – قۇرىلتايشىلاردىڭ مۇنداي شەشىم قابىلداعانى راس. بەلگىلى بولعانداي، اتالمىش باسپا اكسيالارىنىڭ 75%-ى سالتانات اتۋشيەۆانىڭ يەلىگىندە (التىنبەك سارسەنبايەۆتىڭ جۇبايى). قالعانى ازىرگە وزىمدە قالدى. وسى ورايدا ول مۇنداي شەشىم قابىلداۋعا قۇقىلى. ماعان گازەت تارالىمى ازايدى نەمەسە ونىڭ ونلاين-نۇسقاسىن دامىتپادى دەگەن كىنا تاعىلۋى مۇمكىن. ءبىراق، نەگىزىنەن، سالتانات اتۋشيەۆاعا بۇل تۇرعىدا قىسىم جاسالعان سياقتى" - دەپ مالىمدەدى رىسبەك سارسەنباي.

جاڭا قىزمەتكە تاعايىندالعان رىسبەك سارسەنبايدىڭ 42 جاستاعى ۇلى نۇرلان سارسەنبايدىڭ تىلشىلىك تاجىريبەسى جوق. بۇل ۋاقىتقا دەيىن ول قازاقستاننىڭ ءتۇرلى ەلدەردەگى ەلشىلىكتەرىندە ديپلوماتيالىق قىزمەت اتقارىپ كەلگەن ەكەن. بۇل جايىندا ونىڭ اكەسى رىسبەك سارسەنباي ايتىپ بەردى.

ايتا كەتەر بولساق، "قامشى" ءتىلشىسى "جاس الاش" گازەتى رەداكسياسىنىڭ دا بۇرىنعى مەكەنجايىنان اياقاستى كوشىپ كەتكەنىن انىقتادى. الايدا، وعان گازەتتىڭ بۇگىنگە دەيىنگى قىزمەتكەرلەرى قارسى پىكىردە. گازەت رەداكسياسىنىڭ كوشىپ كەتكەنىن ولار دا بىلمەي قالعان. الايدا، گازەت سايتىنداعى مەكەنجاي ازىرگە وزگەرگەن جوق.

سونىمەن قوسا گازەتتىڭ سايتتاعى مالىمەتىندە باس رەداكتور ءالى رىسبەك سارسەنباي ۇلى بولىپ جازىلىپ تۇر.