2017 جىلدىڭ 21 اقپانىندا قازاقستان رەسپۋبليكاسىنىڭ سىرتقى ىستەر مينيسترلىگىنە قىرعىز رەسپۋبليكاسىنىڭ ۋاقىتشا سەنىمدى وكىلى قايناربەك توكتومۋشيەۆ شاقىرتىلعان. وتكەن كەزدەسۋدە قازاقستاننىڭ سىرتقى ىستەر ءمينيسترىنىڭ ورىنباسارى عالىمجان قويشىبايەۆ قىرعىز ديپلوماتىنا «قىرعىزستان پرەزيدەنتىنىڭ Euronews تەلەارنا ەفيرىندە 2017 جىلدىڭ 17 اقپانىنداعى مالىمدەمەسىمەن كەلىسپەۋشىلىك جانە تاڭعالۋ» بىلدىرىلگەن نوتا تاپسىرعان.

قىرعىزستان پرەزيدەنتى المازبەك اتامبايەۆتىڭ 17 اقپاندا ەۆرونيۋس ارناسىنا بەرگەن قازاقستاندى ايىپتاعان  سۇحباتىنا قاتىستى قىرعىز رەسپۋبليكاسىنىڭ سىرتقى ىستەر ۆيسە-مينيسترى دينارا كەمەلوۆا ءوز تۇسىنىكتەمەسىن بەرگەن بولاتىن.

«ساۋىردەگى وقيعالارعا بايلانىستى قازاقستانمەن شەكارانى جابۋ ادامدار ءۇشىن قيىندىقتار تۋدىرعان. سونىڭ ىشىندە ادام ولىمىنە اكەلگەن وقيعالار دا بولعان. اتاپ ايتقاندا شەكارادان زاڭدى تۇردە وتە الماعان ءبىر توپ جىگىت شۋ وزەنىنەن ءجۇزىپ وتپەك بولعان. اتا-انالارى مەديسينالىق جاردەم الۋ ءۇشىن شەكارادان وتكىزە الماعان بالالاردىڭ كوز جۇمىپ جاتقانى تۋرالى حابارلامالار دا كەلگەن»، - دەگەن بولاتىن كەمالوۆا.

دينارا كەمەلوۆا اتاپ وتكەندەي، راسىمەن دە، 2010 جىلى قىرعىزستان ازاماتتارىنىڭ قازاسىنا اكەلىپ سوققان وقيعالار بولعان. سول جىلى ازاماتتار زاڭدى جولمەن شەكارادان اسا الماعان سوڭ، جاس جىگىتتەر شۋ وزەنىنەن ءجۇزىپ وتپەك بولعان.  اۋىرىپ جاتقان بالاسىن شەكارادان اسىرا الماعان اتا-انانىڭ بالاسى قايتىس بولعان. سول ءبىر جارىم ايعا سوزىلعان شەكتەۋ كەزىندە قاتتى سىرقات ادامدارعا ءدارى جەتكىزۋ مۇمكىن بولماعان سوڭ، ناۋقاستار كوز جۇمعان. قىرعىز رەسپۋبليكاسىنا اسا قاجەتتى دارى-دارمەك جەتپەي قالعان سوڭ، مىڭداعان ادامنىڭ ومىرىنە ءقاۋىپ تونگەن. شەكارا جابىلعان سوڭ، قىرعىز حالقىنىڭ الەۋمەتتىك-ەكونوميكالىق جاعدايى ناشارلاپ، شيەلەنىس ءورشي تۇسكەن.

ەلدىڭ سىرتقى ىستەر ۆيسە-مينيسترى دينارا كەمەلوۆا مەن بىشكەكتەگى ق ر توتەنشە جانە وكىلەتتى ەلشىسى ايىمدوس بوزجىگىتوۆتىڭ كەزدەسۋىندە دە قىرعىزستاندىق تاراپ قازاقستاننىڭ «كورشىلەردى وقشاۋلاپ تاستادى» دەگەن سوزگە قاتىستى داۋ تۋعىزباۋدى ۇسىنعان ەدى.

ەسكە سالساق، Euronews تەلەارناسىنا بەرگەن سۇحباتىندا المازبەك اتامبايەۆ ءجۋرناليستىڭ «بۇل وداق (ەاەو-نى ايتىپ وتىر - رەد.) كوپ جاعدايدا رەسەيدىڭ مۇددەسىن ەلەپ-ەسكەرەدى دەپ سانايسىز با؟ (...) دەگەن سۇراعىنا بىلاي دەپ جاۋاپ بەردى: «ءبىز ساۋدا-ساتتىق جۇرگىزىپ، كورشىلەرمەن جۇمىس جاساۋىمىز قاجەت. ەگەر ءبىز ەۋرازيالىق ەكونوميكالىق وداققا كىرمەسەك، بىزگە شەكتەۋ ءقاۋپى تونەر ەدى. 2010 جىلى قازاقستان بىزگە 1،5 ايعا شەكتەۋ قويعاندا، بىزدە ءتىپتى ادام قۇرباندارى دا بولدى. ءيا سولاي بولدى، سەبەبى شەكتەۋ دەگەن جاقسى نارسە ەمەس. (...)».