قوستانايدا وبلىستىق جۇيكە جۇيەلەرى ديسپانسەرىنىڭ بۇرىنعى باس دارىگەرى قاسكويلەردىڭ قولىنان ايانىشتى جاعدايدا كوز جۇمدى. قازىرگى تاڭدا مارقۇم راشيدا ساندىبايەۆانىڭ دەنەسىندە 30-دان استام پىشاق جاراقاتى بار ەكەنى انىقتالىپ وتىر. بۇرىنعى باس دارىگەردىڭ مۇردەسىن تۋىستارى كەشە تاڭەرتەڭگى ساعات 11 شاماسىندا ءوز ۇيىنەن تاپقان، دەپ حابارلايدى Baq.kz
وسىناۋ سۋىت حابار قوستانايلىقتاردى ەسەڭگىرەتىپ تاستادى. ويتكەنى، ءوزىنىڭ باۋراپ الاتىن جايدارى مىنەزىمەن، قىزمەتىنە ادال قارايتىن اق حالاتتى ابزال جاننىڭ قازاسى كىم-كىمگە بولسا دا اۋىر ءتيىپ وتىرعانى جاسىرىن ەمەس.
«قوستاناي وبلىسىنا تانىمال بىلىكتى باسشى، كاسىبىنە ادال دارىگەر راشيدا ساندىبايەۆانىڭ كىسى قولىنان قازا تاپقاندىعى انىقتالىپ وتىر. ونىڭ دەنەسىنە 30-دان استام پىشاق جاراقاتى سالىنعان. مارقۇمنىڭ جانسىز دەنەسى ءوز ۇيىنەن تابىلدى. وبلىستىق جۇيكە جۇيەلەرى ديسپانسەرىن ۇزاق جىلدار بويى باسقارعان ساندىبايەۆا زەينەتكە شىققاننان كەيىن سوت-پسيحياتريالىق ساراپشىسى بولىپ جۇمىس ىستەگەن. بىلىكتى دارىگەردىڭ ءولىمى ونىڭ قىزمەتىمەن بايلانىستى بولۋى مۇمكىن»، – دەيدى قوستاناي وبلىستىق ءىىد باسپا ءسوز قىزمەتىنىڭ باسشىسى ەلەنا كاشيرينا
وبلىستىق ىشكى ىستەر دەپارتامەنتى اتالمىش كىسى ولىمىنە قاتىستى تەرگەۋ ءىسىنىڭ قۇپيا وتۋىنە بايلانىستى بۇدان وزگە اقپارات بەرۋدەن باس تارتتى.
ال، قوستاناي وبلىستىق دەنساۋلىق ساقتاۋ باسقارماسى ايانىشتى جاعدايدا كوز جۇمعان راشيدا ساندىبايەۆانىڭ وتە بىلىكتى باسشى بولعانىن ايتتى.
«راشيدا قوجاحمەت قىزى ءومىرىنىڭ 36 جىلىن پسيحياتريا سالاسىنا ارنادى. 2005 جىلدان بەرى وسى سالاداعى وبلىستىق اۋرۋحانانىڭ باس دارىگەرى بولدى. ونىڭ سىرتىندا كوپتەگەن جىلداردان بەرى دەنساۋلىق ساقتاۋ باسقارماسىندا شتاتتان تىس باس پسيحياتر قىزمەتىن قوسا اتقاردى»، – دەيدى قوستاناي وبلىستىق دەنساۋلىق ساقتاۋ باسقارماسىنىڭ اقپاراتتىق-ساراپتامالىق ءبولىمىنىڭ باسشىسى انۋار ەدريسوۆ.
قازىرگى تاڭدا وسى جانتۇرشىگەرلىك كىسى ولىمىنە قاتىستى قىلمىستىق ءىس قوزعالىپ، كۇدىكتىلەر ىزدەستىرىلۋ ۇستىندە.
پىكىر قالدىرۋ