مەكتەپ ديرەكتورى ايدارحان ازىمبايەۆ پەن ەسەپشى مايرا ەدىلبايەۆانىڭ سوتى بۇگىن سوت زالىندا ەمەس، ع.جۇبانوۆا اتىنداعى وبلىستىق فيلورمونيادا ءوتتى. مۇندا قالاداعى مەكتەپ، كوللەدج ديرەكتورلارى تۇگەل جينالعان. ارىپتەستەرىنىڭ كوزىنشە ايىپتالۋشىلارعا اقتوبە قالالىق №2 سوتىنىڭ سۋدياسى گۇلنار تىلەپوۆا ۇكىم شىعاردى.

«ايىپتالۋشى ايدارحان ازىمبايەۆ ق ر قىلمىستىق كودەكسىنىڭ 366-بابىنىڭ 2-بولىگىندە كوزدەلگەن قىلمىستى جاساۋدا كىنالى دەپ تانىلىپ، وعان وزىنە تيەسىلى مۇلكى تاركىلەنسىن. ءبىلىم جۇيەسىندەگى باسقارۋ لاۋازىمداردى اتقارۋ قۇقىعىنان ءومىر بويى ايىرا وتىرىپ، 3 جىل مەرزىمگە باس بوستاندىعىنان ايىرۋ جازاسى تاعايىندالسىن»، - دەدى سۋديا گۇلنار تىلەپوۆا.

№24 مەكتەپتىڭ ديرەكتورى قىزمەتىنە جاقىندا تاعايىندالعان ايدارحان ازىمبايەۆتىڭ ءۇش بالاسى مەن زەينەت جاسىنداعى اتا-اناسى بار. ول ارىپتەستەرىنىڭ كوزىنشە قاماۋعا الىندى. ال، پاراقورلىققا دەلدال بولعان ەسەپشى مايرا ەدىلبايەۆاعا ايىپپۇل تۇرىندەگى جازا تاعايىندالدى. ول 3 ميلليون تەڭگە ايىپپۇلدى ءبىر اي ىشىندە وتەۋى ءتيىس. بولماعان جاعدايدا سوت ۇكىمى وزگەرۋى مۇمكىن.

«مايرا ەدىلبايەۆا ق ر قىلمىستىق كودەكسىنىڭ 368-بابى 1-بولىگىنە سايكەس كىنالى دەپ تانىلىپ، ونىڭ وزىنە تيەسىلى مۇلكى تاركىلەنسىن. ءبىلىم بەرۋ جۇيەسىندەگى باس ەسەپشى لاۋازىمىن اتقارۋ قۇقىعىنان ءومىر بويى ايىرا وتىرىپ، پارانىڭ ون ەسەلەنگەن سوماسى مولشەرىندە، ياعني 3 ملن تەڭگە كولەمىندە ايىپپۇل جازاسى تاعايىندالسىن. ۇكىم زاڭدى كۇشىنە ەنگەننەن كەيىن ءبىر اي ىشىندە ايىپپۇلدى تولەنۋى ءتيىس. ق ر قك 41-بابىنىڭ 3-تارماعىنا سايكەس ايىپپۇل تولەۋدەن جالتارعان جاعدايدا ق ر قك 368 بابىنىڭ 1-بولىگىنە سايكەس باس بوستاندىعىنان ايىرۋ جازاسىنا اۋىستىرىلۋى مۇمكىن»، - دەدى سۋديا گۇلنار تىلەپوۆا.

قاڭتار ايىندا اقتوبە قالاسىنداعى №24 لينگۆيستيكالىق مەكتەپ-گيمنازيانىڭ ديرەكتورى ايدارحان ازىمبايەۆ مەكتەپتىڭ باس ەسەپشىسى مايرا ەدىلبايەۆا ارقىلى اسحانا مەڭگەرۋشىسىنەن 300 مىڭ تەڭگە پارا العان. باسشىعا اسحانا مەڭگەرۋشىسى كورسەتىلگەن قارجىنى ەكى ءبولىپ بەرگەن. كەيىن مەكتەپ ديرەكتورىن سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ وبلىستىق دەپارتامەنتىنىڭ قىزمەتكەرلەرى ۇستادى. قوس ايىپتالۋشى دا كىنالارىن تولىق مويىنداپ، سوتتان كەشىرىم سۇرادى. سونداي-اق، اقتوبە قالالىق №2 سوتىمەن وبلىستىق ءبىلىم باسقارماسىنىڭ اتىنا جەكە قاۋلى شىعارىلدى.