شىمكەنتتىك انيماتورلار جاساعان «قازاق ەلى» تۋىندىسى كايردە وتكەن ح حالىقارالىق انيماسيالىق فيلمدەر فورۋمىندا باس جۇلدەنى جەڭىپ الدى. بۇل جونىندە 24.kz جاڭالىقتار قىزمەتى حابارلايدى.

وتاندىق ءونىم مۋزىكالىق سۇيەمەلدەۋى مەن رەجيسسۋرالىق ۇيلەسىمى جاعىنان دا قوس اتالىم يەگەرى اتاندى. انيماسيالىق فيلمدە قازاق حاندىعىنىڭ نەگىزىن قالاعان كەرەي مەن جانىبەكتىڭ بالالىق شاعى مەن ەل باسقارعان كەزدەرىنە دەيىنگى ارالىق قامتىلعان. «ساق جەبە» كينوستۋدياسىنىڭ انيماتورلارى مۋلتفيلمگە سوڭعى ۇلگىدەگى 2D جانە 3D تەحنولوگيالارىن قولدانعان. قازاق حاندىعىنىڭ 550 جىلدىعىنا وراي جاسالعان تۋىندى وتكەن جىلدىڭ مامىر ايىنان باستاپ كورسەتىلىمگە شىقتى. ال، مىسىرداعى 50-دەن استام ەلدىڭ انيماسيالىق جۇمىستارى قاتىسقان بايقاۋدا تۋىندى قازاق تىلىندە كورسەتىلىپتى. سوعان قاراماي الەمنىڭ نازارىن وزىنە اۋدارعان.

باتىرحان داۋرەنبەكوۆ، «قازاق ەلى» انيماسيالىق ءفيلمىنىڭ رەجيسسەرى: - كانن فەستيۆالىنىڭ كوركەمدىك كەڭەسشىسى بريدجو سانتوس دەگەن رەجيسسەر بولدى، سول كىسى ايتادى: «بۇنى بارلىق ەلدەردە كورسەتۋ كەرەك، ويتكەنى مىناۋ پاتريوتتىق تاقىرىپ، بارلىق ەلدەرگە، بارلىق ەلدەردىڭ بالالارىنا ءتان نارسە. وسى جاعىنان العان كەزدە بۇل وتە ۇتىمدى. بىرىنشىدەن، سىزدەردىڭ تاريحتارىڭىزدى ءبىلىپ جاتىرمىز، ەكىنشىدەن، ءبىزدىڭ بالالارعا دەگەن بەرەر تاربيەسى مول» دەپ ءتۇسىنىپ جاتىر.