ۆلاديمير پۋتين دونەسك حالىق رەسپۋبليكاسى جانە لۋگانسك حالىق رەسپۋبليكاسىنىڭ پاسپورتتارى رەسەي  فەدەراسياسىنىڭ اۋماعىندا جارامدى دەگەن جارلىققا قول قويدى. وسىعان وراي ۋكراينانىڭ شىعىسىنداعى وزدەرىن بولەك مەملەكەتپىز دەپ جاريالاعان وبلىستىڭ تۇرعىندارى جاپپاي جاڭا قۇجات الۋعا كىرىسىپ كەتتى. بۇل جونىندە 31.kz جاڭالىقتارى حابارلايدى.

پۋتين جارلىعى بويىنشا لۋگانسك پەن دونەسك وبلىستارىنىڭ تۇرعىندارى ساياسي احۋال تۇزەلگەنشە رەسەي اۋماعىندا رەسمي تۇردە ءبىلىم الۋعا ءارى جۇمىس ىستەۋگە قۇقىلى ەكەن. مۇنداي مۇمكىندىكتى پايدالانۋ ءۇشىن ۋكراينانىڭ 50 مىڭعا جۋىق ازاماتى ءتولقۇجاتىن اۋىستىرىپ ۇلگەرگەن.  كرەمل ءوز ارەكەتىن زارداپ شەككەن اۋدانداردىڭ تۇرعىندارىنا كومەك كورسەتۋ ءۇشىن  جاسالىپ وتىر دەپ تۇسىندىرەدى. الايدا،  ۋكراينا بيلىگى  كرەملدىڭ سەپاراتيستەردىڭ پاسپورتىن مويىنداۋى ولاردىڭ ەكى وبلىستى باسىپ العانىن مويىنداۋمەن تەڭ دەپ،  باتىستى رەسەيگە قارسى سانكسيالاردى كۇشەيتۋگە شاقىردى. 

پەتر پوروشەنكو، ۋكراينا پرەزيدەنتى:

- ءبىز ءقازىر جانجالدى رەتتەۋ جونىندەگى مينسك كەلىسىمىنىڭ ساقتالمايتىنىنا كۋا بولىپ وتىرمىز. سوعىستى دوعارۋ جونىندەگى رەجيمنىڭ بۇزىلۋى بىلاي تۇرسىن، ەندى فەيك مەملەكەتتىڭ، فەيك قۇجاتى دا مويىندالىپ وتىر.