"وزگە الماتى" ، "ءتىل ساقشىسى"، "تاريح تارازىسى"، "تاعدىر مەن تۇلعا"، "بولمىس"، "پىكىرلەر پيراميداسى" سىندى بىرەگەي باعدارلامالارىمەن جۇرت كوڭىلىنەن شىققان «الماتى» تەلەارناسى الاتايداي ءبۇلىنىپ جاتىر. وسى كۇنگە دەيىن ءىرىلى-ۇساقتى 22 جوبانى ىسكە اسىرىپ، قازاقتىڭ قامىن كۇيتتەگەن بىلىكتى باسشى، قارىمدى جۋرناليست سەرىك ابىكەن ۇلىنىڭ دا ارنادان الىستاپ جاتقانىن ەستىدىك. دوسان قىزايبەك ۇلى، شىنار ساعىندىقوۆا، نازىم ستامبەكوۆا، ماقسات ەرجان ۇلى، نۇربەك ءتۇسىپحان، جاراس نيازبەك سىندى «اقمىلتىق» جۋرناليستەردىڭ باسىن قوسىپ، «الماتىنىڭ» دەڭگەيىن التى قىردان اسىرعان سەرىك ابىكەنۇلىن سىيدىرماي جاتسا، وندا تەلەارنادا «تەرەڭدەگەن» ساياساتتىڭ ءجۇرىلىپ باستاعانى. ءبىز ارىپتەسىمىز جاراس نيازبەكتى تەلەارنادا بولىپ جاتقان وسى جاعداياتتار تۋراسىندا اڭگىمەگە تارتقان ەدىك.
– بۇل – بيتكە وكپەلەپ، توندى وتقا جاعۋ ەمەس. ۇلت مۇددەسى مەن قازاق ماسەلەسى تارازىعا تارتىلعان جەردە قاراپ قالۋ ەزدىك، ولىممەن تەڭ. قازاق جۋرناليستەرى قاشانعى قولجاۋلىق بولادى؟ قازاقتىڭ قازىنالى تاريحىن ايتا الماساق، تۋعان ءتىلىمىزدى تۇعىرىنا قوندىرا الماساق، ۇلتىمىزدىڭ ۇلىقتىعىن كورسەتە الماساق، نەسىنە قالام الىپ، جۇرت الدىندا جارقىلداپ ءجۇرمىز؟! كۋيانوۆتاي باز بىرەۋلەردىڭ ايتقانىنا كونىپ، ايداۋىنا جۇرە بەرگىمىز كەلمەدى. جۇمىستان بوساعان 50-60 ادام بىردەن جۇمىس تاۋىپ، جاقسى ورىندارعا جايعاسا كەتەدى دەپ ويلامايمىن. ءبىر ادام ەمەس، بەس ادام ەمەس، بۇكىل قازاق ءبولىمىنىڭ جۇمىستان كەتۋى ۇلتجاندى ارىپتەستەردى بەي-جاي قالدىرا قويماس. ماسەلە ءبىر ادامنىڭ ارتىنان ەرىپ كەتۋدە ەمەس، ءار قىزمەتكەر بۇل قادامعا سانالى تۇردە، كەسىپ-پىشىپ، ءوز ەركىمەن بارىپ وتىر.
– بۇل ءۋاجىڭىزدى تەك قازاق جۋرناليستەرىنىڭ اتىنان ايتىلعان اڭگىمە دەپ قابىلدايمىز با؟
– ءيا، دەگەنمەن كەتىپ جاتقانداردىڭ ىشىندە تەك قازاقتىلدىلەر ەمەس، ورىس ءبولىمىنىڭ جۋرناليستەرى دە بار. ونى كۋيانوۆ ايتپاي وتىر...
– ورىس جۋرناليستەرى جۇمىستان نە ءۇشىن كەتىپ جاتىر؟
– ولارعا دا قىسىم بولعان. ءۇش اپتا بۇرىن كۋيانوۆ بايزاق دەگەن بىرەۋدى ورىس جاڭالىقتارىنىڭ رەداكتورى ەتىپ وتىرعىزدى. ەستۋىمىزشە، ول تەلەارنانىڭ باسقان-تۇرعان تىرشىلىگىن اكىمشىلىككە جەتكىزىپ وتىرعان كورىنەدى. مۇنداي جاعداي، ارينە، جۋرناليستەرگە ۇنامايدى.
– ۇزىنقۇلاقتان ەستۋىمىزشە، رەسەي بيلىگى قازاقستانداعى ءباسپاسوزدى باقىلاۋعا الىپ وتىرۋ ءۇشىن، ۇلتتىق قۇندىلىقتاردىڭ كەڭ قانات جايىپ كەتپەۋى ءۇشىن ميلليونداعان قارجى ءبولىپ جاتىر-مىس. سىزدەردىڭ "الماتى" تەلەارناسىندا بولىپ جاتقان جاعداي سونىڭ تىكەلەي كورىنىسى ەمەس پە؟ قالاي ويلايسىز؟
– ول تۋرالى ناقتى ەشنارسە ايتا المايمىن، ءبىراق ۇلتقا قارسى، تىلگە قارسى، قازاقي قۇندىلىقتارعا قارسى مۇددەلى توپ بار. سولار كۋيانوۆتاردىڭ قولىمەن وت كوسەپ وتىر.
پىكىر قالدىرۋ