بۇل تۋرالى finprom.kz ساراپتامالىق پورتالى مالىمدەدى.

ساراپشىلاردىڭ مالىمەتىنشە، وتاندىق مەديسينا سالاسىنىڭ نارىقتاعى دەڭگەيى جايلاپ ارتىپ كەلەدى. وعان مەملەكەتتىك قولداۋ مەن بيزنەستىڭ الەۋمەتتىك جاۋاپكەرشىلىگى اياسىندا اتقارىلىپ جاتقان جۇمىستار ىقپال ەتۋدە. ناقتىراق ايتساق، 2016 جىلى ءىرى مەديسينالىق مەكەمەلەردىڭ بيۋدجەتتىك شىعىنى 610 ملرد تەڭگە بولدى. ال جەكە جانە شاعىن مەديسينالىق ورتالىقتار 83،5 ملرد تەڭگەگە دارىگەرلىك كومەك كورسەتكەن. بۇل سوڭعى بەس جىلداعى جوعارى كورسەتكىش. ال ۇكىمەت تاراپىنان مەديسينالىق مەكەمەلەرگە بولىنەتىن قارجى كولەمى بيىل 30 پايىزعا ارتىپ، 771 ملرد تەڭگەگە جەتتى. قارجىنىڭ باسىم بولىگى تۇرعىندار دەنساۋلىعىنا اسا قاجەتتى دارى-دارمەكتەر ساتىپ الۋعا جۇمسالماق. ساراپشىلاردىڭ پىكىرىنشە، لوگيستيكالىق جۇيەنى رەتكە كەلتىرسەك، دارى-دارمەك ءوندىرۋشى مەن ونى تاراتۋشىلار اراسىندا تىكەلەي بايلانىس ورناتىپ، الىپ-ساتارلارعا جول بەرىلمەس ەدى. سوندا قاجەتتى دارىلەر قولجەتىمدى بولار ەدى، ءارى قىمباتتاۋىنا جول بەرىلمەيدى.

- نەگىزگى ماسەلە مۇندا ۇكىمەتتىڭ باسقارۋىنا بايلانىستى. ەڭ باستىسى بۇل سالاعا بىلىكتى مامانداردى دۇرىس تاڭداۋ ءبىلۋ كەرەك. مەديسينا سالاسىنا جىل سايىن بولىنەتىن قارجىنىڭ كولەمى ارتىپ كەلەدى، سوندىقتان ونى رەتتەۋگە بولادى دەپ ويلايمىن، - دەيدى فارميندۋستريا سالاسىنىڭ مامانى قايرات اۋباكىروۆ.