28 ناۋرىزدان، ياعني بۇگىننەن باستاپ بيومەتريالى ءتولقۇجاتتارى بار گرۋزيا ازاماتتارى شەنگەن ايماعىنا ءوتۋ ءۇشىن ۆيزانى قاجەت ەتپەيتىن بولادى، دەپ حابارلايدى bbc.com.

ەۋروپالىق وداققا ءوتۋ ءۇشىن ۆيزاسىز رەجيم قالىپتاستىرۋعا ۇزاق جىلدار بويى اتسالىسقان گرۋزيا ەلى مولدوۆادان كەيىن وسىنداي ۇلكەن مۇمكىندىككە قول جەتكىزگەن ەكىنشى مەملەكەت بولدى.

گرۋزيا ازاماتتارى قانداي مەملەكەتتەرگە ۆيزاسىز وتە الادى؟

گرۋزيادا ۆيزاسىز رەجيم كۇشىنە ەنگەلى بيومەتريالى ءتولقۇجاتتارى بار ازاماتتار 90 كۇننەن 180 كۇنگە دەيىنگى ارالىقتا ەۋروپانىڭ 30 مەملەكەتىندە ۆيزاسىز تۇراقتاي الادى.

گرۋزيا ازاماتتارى شەنگەن ايماعىنداعى مەملەكەتتەرگە وتۋدە ۆيزانى قاجەت ەتپەيدى. سونداي-اق، ايماققا كىرۋگە ۇمىتكەر مەملەكەتتەر، وعان قوسا ەو-عا كىرمەيتىن يسلانديا، ليحتەنشتەين، نورۆەگيا، شۆەيساريا ەلدەرىنە ۆيزاسىز كىرە الاتىن مۇمكىندىككە يە بولدى.

الايدا، يرلانديا جانە ۇلىبريتانيا ەلدەرىنە كىرۋ ءۇشىن گرۋزيا ازاماتتارىندا ادەتتەگىدەي ۆيزانىڭ بولۋى مىندەتتى. سونداي-اق، ەۋروپالىق مەملەكەتتەرگە وقۋ نەمەسە جۇمىس ىستەۋ ماقساتىندا ۇزاق ۋاقىتقا باراتىن بولسا، ازاماتتا ۆيزا بولۋ كەرەك.

شەنگەن ايماعىنا شىعاردا ءار گرۋزيا ازاماتىندا ەلگە قايتار بيلەت پەن ۋاقىتشا ساقتاندىرۋدىڭ بولۋى تالاپ ەتىلەدى. سونىمەن قاتار، ول ازاماتتاردا شەنگەن ايماعىندا بولعان ۋاقىتتا جەتكىلىكتى قاراجاتتىڭ بولۋى جايىندا قۇجاتتاردىڭ بار-جوعى نەگىزگە الىنادى.

گرۋزيا بيلىگى شەنگەن ايماعىنداعى مەملەكەتتەرگە شىعاردا ءار ازاماتتا وسى قۇجاتتاردىڭ بولۋىن ەسكەرتەدى.

ۆيزاسىز رەجيم تەك تۋريستىك، وتباسىلىق، سونداي-اق ىسكەرلىك ساپارلارعا شىعاتىن ازاماتتارعا قاتىستى. ال، ەۋروپا مەملەكەتتەرىنە جۇمىسقا ورنالاسۋ ماقساتىندا بارعان جاعدايدا، ۆيزا بولۋى كەرەك.

تبيليسي بيلىگى ابحازيا جانە وڭتۇستىك وسەتيا تۇرعىندارى دا ۆيزاسىز رەجيمدى پايدالانا الاتىنىن ەسكەرتكەن ەدى. الايدا، كەي مەملەكەتتەردىڭ بيلىگى بۇل شەشىمنىڭ تەك گرۋزياعا قاتىستى ەكەنىن العا تارتىپ، ابحازيا مەن وڭتۇستىك وسەتيا تۇرعىندارىنا قاتىسى بولماۋى ءتيىس ەكەنىن ەسكەرتتى.

گرۋزيانىڭ كەيبىر تۋراگەنتتىكتەرىنىڭ مالىمەتىنشە، ۆيزاسىز رەجيم ورناعان سوڭ ەۋروپالىق مەملەكەتتەرگە شىعۋ جايىندا سۇرانىستىڭ كوبەيگەندىگى اۆيابيلەتتەردىڭ باعاسىنا دا اسەر ەتپەي قويمادى.   

Love Travel تۋريستىك اگەنتتىگىنىڭ مەنەدجەرى سوفو ءحيتاريشۆاليدىڭ مالىمەتىنشە، بىلتىرعى جىلمەن سالىستىرعاندا سۇرانىس 35 پايىزعا وسكەن. سوعان وراي، بيلەت قۇنى 40 پايىزعا دەيىن كوتەرىلدى.

ۆيزاسىز ءتارتىپ بۇزىلعان جاعدايدا قانداي شارا قولدانىلماق؟

ەۋروپا مەملەكەتتەرىنە وتەردە ءتارتىپ بۇزىلماۋدىڭ جولدارى دا قاراستىرىلىپ، گرۋزيا بيلىگى اقپاراتتىق ناۋقان جۇرگىزدى.

گرۋزيا تۇرعىندارى ەۋروپا مەملەكەتتەرىندە بولعان ۋاقىتتا بيلىكتىڭ نازارىندا بولادى. ەگەر ەۋروپادا ءۇش ايدان كوپ ۋاقىت تۇراقتاسا، گرۋزيالىقتار بۇل جايىندا ەۋروپالىق وداقتى حاباردار ەتەدى. ءسويتىپ، ءتارتىپتى بۇزعان ازاماتقا ىزدەۋ سالىنىپ، رەادميسسيا پروسەسى باستالادى.

شەنگەن ايماعىنا ۆيزاسىز ءتارتىپ ارقىلى شىققان ازامات ءتارتىپ بۇزسا، 5 جىلعا دەيىن باس بوستاندىعىنان ايىرىلۋى مۇمكىن نەمەسە 3 مىڭ ەۆرو كولەمىندە ايىپپۇل تولەيدى.

ۆيزالىق رەجيمنىڭ ورناۋى ەۋرووداققا مۇشە بولماق مەملەكەتتەر ءۇشىن ساياسي ماڭىزدىلىعى جوعارى.