پوليسيا قىزمەتكەرىنىڭ ۋاز ماركالى كولىگىنىڭ توبەسىنە شىعىپ، سەلفي جاساماقشى بولعان پاۆلودار قالاسىنىڭ تۇرعىنى وپىق جەدى، دەپ حابارلايدى Baq.kz
ءساتتى كادر ءۇشىن وسىنداي قادامعا بارعان تۇرعىنعا قاتىستى ءىس پاۆلودار قالالىق اكىمشىلىك سوتىندا قاراستىرىلدى.
ءىس ماتەريالدارىنا سۇيەنسەك، 23 جاستاعى بەكزات اشۋوۆ كوڭىل كوتەرىپ، پوليسەي كولىگىنىڭ فونىندا سەلفي جاساماقشى بولىپتى. جاس جىگىت الدىمەن ۋاز كولىگىنىڭ كاپوتىنا، كەيىن توبەسىنە شىعىپ العان. ول ازداي، شاعىمدانعان تۇرعىنداردى بالاعاتتاعان. سوت وتىرىسىندا ايىپتالۋشى كىناسىن تولىق مويىنداپ، وسىنداي ارەكەتكە بارۋعا «تەنتەك سۋ» سەبەپكەر بولعانىن جەتكىزدى.
پاۆلودار وبلىستىق سوتىنىڭ باسپا ءسوز حاتشىسى ايگەرىم سۇلەيمەنوۆانىڭ ايتۋىنشا، بەكزات اشۋوۆ ۇساق بۇزاقىلىق جاساعانى ءۇشىن سوتتالدى.
«بۇزاقىلىق جاساپ، تۇرعىنداردى بالاعاتتاعانى ءۇشىن 23 جاستاعى ازاماتقا 10 كۇنگە قاماۋعا الۋ تۇرىندە جازا تاعايىندالدى. ايتا كەتەرلىگى، بۇعان دەيىن پاۆلودارلىق اكىمشىلىك جاۋاپكەرشىلىككە تارتىلماعان»، - دەپ حابارلادى ايگەرىم سۇلەيمەنوۆا.
پروكۋرور ا. ماحۆاتوۆانىڭ قورىتىندىسىنا سۇيەنسەك، ايىپتالۋشىعا قاتىستى جازا جەڭىلدەتىلگەن.
«وسىنداي شەشىم قابىلداۋعا ايىپتالۋشىنىڭ كىناسىن تولىق مويىنداعانى سەپ بولدى. بۇل سوتتىڭ وڭ شەشىم قابىلداۋىنا اسەر ەتتى»، - دەيدى پروكۋرور.
پىكىر قالدىرۋ