ەلىمىزدەگى كورەرمەن سانى جاعىنان الدىڭعى قاتاردا تۇرعان بەلگىلى ءانشى قايرات نۇرتاستىڭ ءبىر جىلدارى KN اتتى ۇلتتىق برەندتە كيىم تىگەتىن دۇكەنى اشىلعان. الايدا، بەلگىلى ءبىر جاعدايلارعا بايلانىستى جابىلىپ قالدى. تالايلاردىڭ سۇيىكتىسىنە اينالعان ءانشىنىڭ بۇنىمەن توقتاپ قالار ءتۇرى جوق. ەندى قايرات نۇرتاس ءوزىنىڭ ءموبيلدى قوسىمشاسىن شىعارىپتى. بۇل ەسترادا جۇلدىزىنىڭ تىڭدارماندارى ءۇشىن وتە جاقسى جاڭالىق. ولار ەندىگى ءانشىنىڭ اندەرى مەن وعان قاتىستى جاڭالىقتاردى وسى قوسىمشادان تابا الادى.

بۇل جاڭالىقپەن ءانشىنىڭ اناسى ءارى پروديۋسەرى گۇلزيرا ايداربەكوۆا ءوزىنىڭ ينستاگرام پاراقشاسىندا ءبولىستى. ءموبيلدى قوسىمشا قولدانۋعا ىڭعايلى ءارى قوس تىلدە – قازاق جانە ورىس تىلدەرىندە جاسالعان.

قوسىمشادا قايرات نۇرتاستىڭ اندەرى مەن البومدارى، وعان قاتىستى ب ا ق بەتتەرىندە جاريالانعان جاڭالىقتار، ءانشىنىڭ قولعا العان جوبالارى بار. بۇعان قوسا، وسى قوسىمشا ارقىلى ءانشىنى ءتۇرلى ءىس-شاراعا شاقىرىپ، تاپسىرىس بەرۋگە بولادى. كەز كەلگەن ادام جاڭا قوسىمشانى ۇيالى تەلەفونىنا جۇكتەي الادى.