تۇركيانىڭ قارۋلى كۇشتەرى سيريانىڭ سولتۇستىگىندە جۇرگىزگەن «ەۆفرات قورعانى» وپەراسياسى ءساتتى اياقتالعانىن مالىمدەدى، دەپ حابارلايدى ريا جاڭالىقتار قىزمەتى.

 بۇنداي مالىمەت تۇركيانىڭ ۇلتتىق قاۋىپسىزدىك كەڭەسى ۇيىمداستىرعان وتىرىسىندا ايتىلدى. 

«ەۆفرات قورعانى» وپەراسياسى ۇلتتىق قاۋىپسىزدىكتى قامتاماسىز ەتۋ، دايش لاڭكەستەرىنەن كەلەتىن قاۋىپ-قاتەردەن قورعانۋ، سيريالىق بوسقىنداردى ەلىنە قايتارۋ ءساتتى اياقتالدى»، - دەلىنگەن مالىمدەمەدە. 

 ايتا كەتەيىك، تۇركيا اسكەرى وتكەن جىلدىڭ 24 تامىزىندا سيريا وپپوزيسياسىمەن بىرىگىپ، دايش لاڭكەستەرىنە قارسى «ەۆفرات قورعانى» وپەراسياسىن باستاپ، شەكارالاس دجارابلۋس جانە ەل-باب قالالارىن ءوز قاراماعىنا العان. وسىعان دەيىن تۇركيا پرەزيدەنتى ەردوعان وسى وپەراسيانىڭ باستى ماقساتى - بەس مىڭ شارشى شاقىرىمدى لاڭكەستەردەن تازارتىپ، بوسقىنداردى قونىستاندىرۋدى كوزدەيتىنىن ايتقان.