2017 جىلدىڭ 9-شى ساۋىردە، ساعات 17:00-دە الماتى قالاسىندا «الاتاۋ» ءداستۇرلى ونەر تەاترىندا ءانشى، كومپوزيتور، ونەرتانۋشى، كينوگەر ەرلان تولەۋتايدىڭ «سال سەرىنىڭ سارقىتى ول كەشەگى...» اتتى شىعارماشىلىق كەشى وتەدى.

     كەشتىڭ باستى ماقساتى – ۇلتىمىزدىڭ ۇلى مۋزىكاسىن ۇلىقتاۋ.

«كەش سال سەرىلىك ونەرگە، سولاردىڭ ۇلى رۋحىنا ارنالادى. ءبىرجان سال باستاعان ۇلى سال-سەرىلەردىڭ ءومىرى مەن ونەرىن پاش ەتەمىن. ولار سۇيگەن سۇلۋلارعا، سال سەرىلەردىڭ باسىنان وتكەن ماحاببات باياندارىنا،  سۇيىنىش-كۇيىنىشتەرىنە، تاعدىر تراگەديالارىنا توقتالامىن. جالپى العاندا، سال-سەرىنىڭ ونەر ۇلىقتايمىن.

كوپتەگەن اندەر شىعاردىم. سول اندەرىم ورىندالادى. كوبىسى العاش رەت ۇلكەن ساحنادا ورىندالماق»، - دەيدى سان قىرلى تالانت يەسى ەرلان تولەۋتاي.

ەرلان تولەۋتاي قازاق اقىندارىنىڭ كوپتەگەن ولەڭدەرىنە ءان شىعارعان. اسىرەسە، ءانشى ماقپال ءجۇنىسوۆا ورىندايتىن «ياپىراي» (ءسوزى مۇقاعاليدىكى) جانە ءانشى مەرۋەرت تۇسىپبايەۆا ايتاتىن «سەن جانە مەن» (ءسوزى جانات اسكەربەكقىزىنىكى) اندەرىن انسۇيەر قاۋىم جىلى قابىلدادى. ابايدىڭ، شاكارىمنىڭ، مۇقاعاليدىڭ، جۇماتاي جاقىپبايەۆ، ەركەش يبراھيم، قايىربەك اسانوۆ، مارفۋعا ايتحوجينا، تۇرسىن جۇماش، جانات اسكەربەك قىزى، قايرات اسقاروۆ، قىرعىز اقىنى اكبار رىسقۇلوۆتىڭ ولەڭدەرىنە جازىلعان كوپتەگەن اندەردىڭ اۆتورى. كومپوزيتوردىڭ كوپتەگەن اندەرى تۇڭعىش رەت ۇلكەن ساحناعا جول تارتقالى وتىر.