ينۆەستيسيالار جانە دامۋ ءمينيسترى جەڭىس قاسىمبەك باتىس قازاقستان وبلىسىنا ساپارى تۋرالى الەۋمەتتىك جەلىدە جازدى:

«نۇرلى جەر» باعدارلاماسى بويىنشا باتىس قازاقستان وبلىسىندا اتقارىلىپ جاتقان جۇمىستارمەن تانىستىق. وسى جىلى وبلىستا 90 مىڭ شارشى مەتر تۇرعىن ءۇي سالىنىپ، كەزەكتە تۇرعان 1200-دەن استام وتباسىنا قولجەتىمدى باعامەن باسپانا بەرىلەدى دەپ جوسپارلانىپ وتىر. 
بيىل باعدارلاما شەڭبەرىندە رەسپۋبليكا بويىنشا 10 ملن. شارشى مەتردەن استام تۇرعىن ءۇيدى (100 مىڭ پاتەردى)، سونىڭ ىشىندە مەملەكەتتىك ينۆەستيسيا ەسەبىنەن 1،6 ملن. شارشى مەتر تۇرعىن ءۇيدى (28 مىڭ پاتەردى) ىسكە قوسۋ كۇتىلىپ وتىر. 
2017 جىلدىڭ قاڭتار-اقپان ايلارىندا قارجىلاندىرۋدىڭ بارلىق كوزدەرى ەسەبىنەن جالپى الاڭى 2،3 ملن. شارشى مەتر بولاتىن تۇرعىن ءۇي پايدالانۋعا بەرىلدى. بۇل وتكەن جىلدىڭ ءدال وسى كەزەڭىمەن سالىستىرعاندا اناعۇرلىم جوعارى كورسەتكىش. ءقازىر ىسكە قوسىلعان تۇرعىن ءۇي ۇلەسى بويىنشا الماتى مەن استانا قالالارى كوش باستاپ تۇر. وبلىستاردىڭ ىشىندە ماڭعىستاۋ مەن وڭتۇستىك قازاقستان وبلىسى جاقسى ناتيجە كورسەتىپ وتىر. قالعان وبلىستاردان دا ءدال وسىنداي ناتيجەلى جۇمىس كۇتەمىز. ايماقتىق اكىمدىكتەر باعدارلاما بويىنشا جىلدىق كورسەتكىشكە قول جەتكىزۋ ءۇشىن مينيسترلىك تاراپىنان قاجەتتى قولداۋ كورسەتىلەدى.