اقتوبە وبلىستىق مامانداندىرىلعان قىلمىستىق ىستەر جونىندەگى اۋدانارالىق سوتىندا وتباسىلىق جانجالعا قاتىستى سوت وتىرىسى باستالدى. ايەلىن اياۋسىز پىشاقتاپ، مالشا باۋىزداعان دەنيس كۋلاشتىڭ ىسىنە سۋديا نۇرلان سۇلتانوۆ ءتوراعالىق ەتەدى دەپ حابارلايدى Nur.kz پورتالى.

وقيعا 2016 جىلدىڭ 16 قاراشاسىندا بولعان. سوتتالۋشى دەنيس كۋلاش اۋىرىپ قايتىس بولعان ءىنىسىنىڭ جەرلەۋ راسىمىنەن كەيىن ىشىمدىك ىشەدى. ايىپتاۋ پاراعىندا جەرلەۋدەن قايتقان سوتتالۋشىنىڭ ۇيىنە قايتار جولدا دۇكەننەن اراق الىپ، ايەلىمەن بىرگە وتىرىپ ىشكەنى جازىلعان.

"جەرلەۋ راسىمىنە تۋىستارىڭ از كەلدى، سەنى سىيلامايدى" دەپ بىرنەشە رەت ايتقان ايەلىنىڭ سوزىنە اشۋلانعان كۋلاش وعان اسحانا پىشاعىن ەكى رەت تىعىپ العان. سول كەزدە ايەلى ايقايلاپ كومەك سۇراپ، قاشۋعا ۇمتىلادى. كۇيەۋى ارتىنان قۋىپ ءجۇرىپ، تاعى دا بىرنەشە جەرىنەن پىشاق سالادى. ارقاسىمەن جەرگە قۇلاعان ايەلىنىڭ دەنەسىنە تاعى دا پىشاق سالىپ، ۇرىپ، تەۋىپ تاستايدى. الاقانىن پىشاقپەن جاراقاتتاپ العان سوتتالۋشى اس ۇيدەن ەكىنشى پىشاقتى اكەلىپ ۇرعان.

سوتتالۋشى ايەلىنە 41 رەت پىشاق جاراقاتىن سالعان.

ايىپتاۋدا سوتتالۋشىنىڭ ايەلىنە 41 رەت پىشاق جاراقاتىن كەلتىرىپ، تاماعىنان باۋىزداپ تاستاعانى ايتىلدى. قيناپ ولتىرگەن ايەلىن تاستاپ، تانىسىنا بارىپ تاعى ىشەدى. الىس تۋىسىنا ءىشىپ وتىرىپ ايەلىن ءولتىرىپ تاستاعانىن ايتقان. ول سەنبەيدى.

تۇندە ۇيىنە قايتىپ كەلگەن سوتتالۋشى قىلمىسىن جاسىرۋ ءۇشىن ايەلىنىڭ دەنەسىن توسەك جاپقىشقا وراپ، دالاداعى دارەتحاناعا تاستايدى. قانعا بويالعان كيىمدەردى ورتەپ، ءبىر پىشاقتى دارەتحاناعا سالىپ جىبەرگەن. ايەلىنىڭ قانى جۇققان ەكىنشى پىشاقتى تازارتىپ، اس ۇيگە قايتا اپارىپ قويادى. ءۇيىن تازارتىپ قويعان سوتتالۋشى العاشىندا ايەلىن ولتىرگەنىن تۋىستارىنان جاسىرادى. سوتتالۋشى سوتتا كىناسىن تولىق مويىندادى.

ءوزىمدى ۇستاي المادىم

"نە بولعانىن بىلمەيمىن. ايەلىممەن ءۇش بوتەلكە اراقتى ءبولىپ ءىشتىم. ءوزىمدى ۇستاي المادىم. ونى اس ۇيدەگى نان تۋرايتىن پىشاقپەن ءولتىردىم. قانشا سوققى بەرگەنىم ەسىمدە جوق. تاماعىنان سولدان وڭعا قاراي كەستىم. قان كوپ كەتتى. ايەلىم: "سەن نە ىستەپ جاتسىڭ؟" دەگەندە عانا ەسىمدى جيدىم. كەش بولدى. دەنەسىن دارەتحاناعا تاستاپ، بارلىق جەردى جۋىپ قويدىم. ەسىكتى جاۋىپ، ۇيدە تاعى ءىشتىم. ۇيىقتاي المادىم. ايەلىم تۇسىمە كىردى. ءبارى قاس قاعىم ساتتە ءوتتى"، - دەيدى كۋلاش.

- "قالاي قاس قاعىم ءسات؟ 41 رەت پىشاق سالعانسىڭ. ونى 1-2 مينۋتتا جاساۋ مۇمكىن ەمەس. ءسىز سيىر، قوي، شوشقا سويىپ كوردىڭىز بە؟"، - دەپ سۇرادى سۋديا سۇلتانوۆ.

- "ءيا..."

- "ولار قينالماسىن دەپ بىردەن ولتىرەدى. سولاي ەمەس پە؟ ءسىز نە ىستەدىڭىز؟ مەنىڭ تۇسىنگىم كەلەدى. كومەك سۇراعانىنا قاراماستان نەگە قينادىڭ"، - دەگەن سوت ءتوراعاسىنا سوتتالۋشى "ول كەزدە نە ىستەگەنىمدى تۇسىنگەن جوقپىن" دەپ جاۋاپ بەردى.

دارەتحانادا جاتقان ايەلدىڭ دەنەسىن پاتەر يەسى تاۋىپ العان. پوليسيا مەن تۋىستارىنا حابار بەرگەن.  سوتتا كۋاگەرلەردەن جاۋاپ الىندى.