قارقارالى اۋدانىنداعى اعادىر اۋىلىن، شەت اۋدانىن،  نۇركەن جانە اقشوقى اۋىلدارىن قار سۋى باستى، - دەپ حابارلايدى «قامشى» پورتالى  tengrinews.kz-كە سىلتەمە بەرىپ. ۆيدەودان سۋ دەڭگەيىنىڭ قاتتى كوتەرىلمەگەنىن كورۋگە بولادى. الايدا اۋىلدا ارنايى رەزەڭكە ەتىكتەرسىز ءجۇرۋ مۇمكىن ەمەس. سونداي-اق، توتەنشە جاعدايدىڭ سالدارىنان كولىك قوزعالىسى قيىنداعان.

قارقارالى اۋدانىن دا قار سۋى باسىپ جاتىر. اقشوقى مەن نۇركەن اۋىلدارى سۋ استىندا قالعان، شارۋاشىلىق قۇرىلىستارىن دا سۋ باسقان. نۇركەن اۋىلى تۇرعىندارىنىڭ ايتۋىنشا، سۋ كەيبىر جەرلەردە ءۇيدىڭ ىشىنە دەيىن كىرىپ جاتىر.
"30 ناۋرىزدا ەلدى مەكەندەردى سۋ باستى. بىلتىرعىدان قاراعاندا ەكى ەسە كوپ سۋ بولدى. دالادا جۇرگەن جىلقىلارىمىز سۋدىڭ ورتاسىندا قالدى"، - دەيدى اۋىل تۇرعىندارى. قۇتقارۋشىلار دا اۋلالاردى سۋ باسقانىن جاسىرىپ وتىرعان جوق. توتەنشە جاعدايلار قىزمەتىندەگىلەر تۇرعىنداردان سابىر ساقتاۋلارىن سۇرايدى.
"وبلىستا ەكى كۇن قاتارىنان جاڭبىر جاۋدى. ونىمەن قوسا قار ەرىپ جاتىر. ارينە، سۋ وزدىگىنەن ەشقايدا كەتپەيدى. اعادىر اۋىلىندا تاڭەرتەڭ سۋدىڭ دەڭگەيى 10 سانتيمەترگە دەيىن جەتتى، ءقازىر باسىلدى. وبلىستا 54 باقىلاۋ پۋنكتى جۇمىس ىستەپ جاتىر. جاعدايدى باقىلاپ وتىرمىز. 100 پايىزعا دايىنبىز"، - دەدى وبلىستىق تجد باسپا ءسوز قىزمەتىندەگىلەر. سونداي-اق، ۆەدومستۆوداعىلار زارداپ شەككەندەردىڭ جوق ەكەنىن ايتىپ ءوتتى.