استانادا قالالىق ءىىد ارنايى جاساعىنىڭ اۋماعىندا جاس قىزمەتكەر اسىلعان كۇيى تابىلدى، - دەپ حابارلايدى «قامشى» پورتالى  tengrinews.kz-كە سىلتەمە جاساپ. قازا تاپقان ەر ادامنىڭ 24 جاستاعى كىشى سەرجانت مەدەت تەمىربايەۆ ەكەنى بەلگىلى بولدى. قازا تاپقان سەرجانت مەدەت تەمىربايەۆتىڭ اناسىنىڭ ايتۋىنشا، ۇلىنىڭ ءمايىتى 8 ناۋرىزدا تابىلعان. "1992 جىلى دۇنيەگە كەلگەن ۇلىم تەمىربايەۆ مەدەت ارنايى جاساقتا قىزمەت ەتۋدى ارمانداعان ەدى. وسىعان بىرنەشە جىل بويى دايىندالدى، قۇجاتتاردى جينادى. ارميادا دەسانتتىق جاساقتا قىزمەت ەتتى. بىلتىر عانا وسى جۇرگىزۋشى بولىپ جۇمىسقا كىرگەن ەدى. وندا بار-جوعى 7 اي 10 كۇن جۇمىس ىستەدى"، - دەدى تەمىربايەۆتىڭ اناسى نۇريا جانايەۆا.

"7 ناۋرىزدا ادەتتەگىدەي جۇمىسقا كەتتى. وزىمەن بىرگە تۇسكى اسىن الىپ كەتتى، كوڭىل-كۇيى جاقسى بولاتىن. سول كۇنى ماعان ەكى رەت قوڭىراۋ سوققان ەدى، ول ماعان كۇنىنە بىرنەشە رەت حابارلاساتىن. شامامەن كەشكى ساعات 8-دەردە ايەلىمەن سويلەسىپ، ساپاردا جۇرگەنىن ايتتى. سودان ۇلىم كەشكى ساعات 9-دا ۇيگە كەلمەي جاتقان سوڭ، ۋايىمداي باستادىم. ءبىراق ءبىر جاعىنان قىزمەتىندە كىدىرىپ قالعان شىعار دەپ ويلادىم. تەلەفونى ءسوندىرۋلى بولدى. ال كەلەسى كۇنى ۇلىممەن بىرگە قىزمەت ەتكەندەر مەدەتتىڭ اسىلىپ قالعانىن ايتتى"، - دەيدى اناسى. نۇريا جانابايەۆا ۇلىنىڭ وز-وزىنە قول جۇمساعانىنا سەنبەيدى. ونىڭ ايتۋىنشا، ۇلى دىنگە سەنەتىن ادام بولعان، مەشىتكە بارىپ تۇراتىن. وتباسى 2 ساۋىردە بولاتىن ۇيلەنۋ تويىندا دايىندالىپ جاتقان ەكەن. مەدەت وتباسىندا جالعىز بالا بولعان، ال اكەسى بىرنەشە جىل بۇرىن قايتىس بولعان.

"مەنى جاساقتىڭ بولىمىنە اكەلگەندە، ۇلىمنىڭ دەنەسى ول كەزدە ءمايىتحاناعا جىبەرىلىپ قويعان ەكەن. ءمايىتتى كورمەدىك، ۇلىمدى سوڭعى رەت قۇشاقتاي دا المادىم. ونى 10 ناۋرىزدا جەرلەدىك"، - دەيدى اناسى. اناسىنىڭ ايتۋىنشا، ول قايعىلى وقيعاعا دەيىن ۇلىنىڭ موينىندا ونى بىرەۋدىڭ بۋىندىرعانى سياقتى ىزدەردى بايقاعان. "ونى بىرەۋ بۋىندىرعانداي، موينى قىزارىپ تۇردى. ول سپورت شەبەرى بولاتىن، ۇنەمى جاتتىعىپ جۇرەتىن. ءبىراق ول ماعان سول كەزدە جاتتىعۋ جاساپ جۇرگەندە جاراقات العانىن ايتتى. ال بولاشاق ايەلىنە جۇمىستا "وڭتۇستىكتىڭ" جىگىتتەرمىن توبەلەسىپ قالعانىن ايتقان. كەيىننەن ءبىز ولاردىڭ ۇلىمنان اقشا مەن وسىدان ءبىر اي بۇرىن ساتىپ العان كولىگىن تالاپ ەتكەنى جايلى بىلدىك"، - دەدى تەمىربايەۆتىڭ اناسى. استانا قالالىق ءىىد پوليسيانىڭ كىشى سەرجانتى مەدەت تەمىربايەۆتىڭ ىشكى ىستەر ورگاندارىندا 2016 جىلدىڭ جەلتوقسانىنان بەرى جۇمىس ىستەگەنىن حابارلادى. وسى وقيعا بويىنشا تەكسەرىس جۇرگىزىلىپ جاتىر. "وسى دەرەك بويىنشا سوتقا دەيىنگى تەرگەۋ جۇرگىزىلىپ جاتىر. باستاپقىدا جۇرگىزىلگەن تەكسەرىس كەزىندە مايىتتە ەشقانداي دەنە جاراقاتتارى انىقتالمادى.قاجەتتى ساراپتامالار تاعايىندالدى. ساراپتاما ناتيجەلەرى بويىنشا پروسەسسۋالدىق شەشىم قابىلدانادى"، - دەدى استانا قالالىق ءىىد باسپا ءسوز قىزمەتىندەگىلەر.