«تاقتار ويىنى» تەلەحيكاياسى جەتىنشى كەزەڭى بيىلعى جىلى شىلدەنىڭ 16-سىندا ەفيرگە شىعادى. فەنتەزي جانرىنداعى امەريكالىق درامالىق تەلەسەريالدىڭ جاڭا كەزەڭىنىڭ پرومو-روليگى شىقتى دەپ حابارلايدى Qamshy.kz

ەسكە سالا كەتسەك، بۇعان دەيىنگى كەزەڭدەرى جىل سايىن ءساۋىر ايىندا شىققان بولاتىن.
بۇعان دەيىن تارالعان اقپارات بويىنشا «تاقتار ويىنى» سەگىز كەزەڭمەن قورىتىندىلانادى. سونىمەن قاتار قىسقا بولادى، بۇرىنعىسىنشا ون بولىمنەن ەمەس تەك جەتى سەريادان تۇرادى.

ايتا كەتسەك، HBO تەلەارناسىن كورسەتىلىپ كەلە جاتقان «تاقتار ويىنى» - دجوردج ءمارتيننىڭ "مۇز بەن وت جىرى" روماندار سيكلى بويىنشا تۇسىرىلگەن فەنتەزي تەلەحيكايا. اقش-تا العاشقى ماۋسىمىنىڭ تۇساۋكەسەرى HBO ارناسىندا 2011 جىلى 17 ساۋىردە ءوتتى؛ 2014 جىلى بارلىق ءتورت ماۋسىمى كورسەتىلدى.

"تاقتار ويىنىنىڭ" ءجۇرىسى ورتاعاسىرلىق ەۋروپانى ەسكە تۇسىرەتىن ويدان شىعارىلعان الەمدە ءوربيدى، ءبىراق ول الەمدە جىل مەزگىلدەرى بىرنەشە جىلدارعا سوزىلادى. سەريالدا ىس-ارەكەت ۇزاق جازدىڭ سوڭىندا باستالادى. سەريالدا ءبىر ۋاقىتتا كوپ كەيىپكەر كورسەتىلەدى جانە ءبىر بىرىمەن بايلانىستى بىرنەشە سيۋجەت جەلىسى ءوربيدى. ولاردىڭ بىرەۋى بىرنەشە بەدەلدى اۋلەتتەردىڭ پاتشالىق تاعى ءۇشىن شايقاسقا ارنالسا، باسقاسى — ەلدىڭ سولتۇستىگىندەگى ەسكى قورعاندى كۇزەتەتىن جۇتاڭ جولداستىق، تابيعاتتان تىس كۇشتەرگە قارسىلىق تۋرالى، ال ءۇشىنشىسى — وتانىنا ورالۋ ءۇشىن شىعىس ەلدەرىندە وزىنە وداقتاس ىزدەپ جۇرگەن قۋعىندالعان حانشايىم دەيەنەريس تارگاريەن تۋرالى. سەريالدا قيال-عاجايىپ جاراتىلىستار دا كورسەتىلەدى: ايداھارلار جانە ارۋاقتار. "تاقتار ويىنى" ءۇشىن وتە جامان جانە وتە جاقسى كەيىپكەرلەردىڭ بولماۋى حاس، كوپتەگەن قاھارماندار ءارتۇرلى ارەكەتتەر جاساپ، كورەرمەن كۇتپەگەن ساتتە ءولىپ قالۋى عاجاپ ەمەس. سەريالدا ساياسات، ءدىن، ازاماتتىق سوعىس، ايەلدەردىڭ قوعامداعى ورنى جانە قىلمىس پەن جازا تاقىرىپتارى قامتىلعان. سەريال ءۇشىن ارنايى بىرنەشە جاساندى تىلدەر جاسالعان، سولاردىڭ ىشىندە دوتراكي ءتىلى دە بار.