قورعانىس مينيسترلىگى 27ء-شى ناۋرىزدان كوكتەمگى اسكەرگە شاقىرۋ ناۋقانىن باستادى. ال، قارۋلى كۇشتەر ساپىندا وتان الدىنداعى بورىشىن وتەگىسى كەلەتىندەردىڭ سانى وتە كوپ. سوندىقتان سىناق تا بارىنشا قاتاڭداتىلعان. بۇل تۋرالى كتك جاڭالىقتارى حابارلايدى.
ءقازىر جەر-جەردەگى قورعانىس باسقارمالارىندا قىزۋ قاربالاس. 18 بەن 27 جاس ارالىعىنداعى جىگىتتەر جاپپاي كومميسارياتقا شاقىرتىلىپ، مەديسينالىق تەكسەرىستەن ءوتىپ جاتىر. قارۋ ۇستاپ، كازارما كورگىسى كەلەتىندەردىڭ كوپتىگى سونشالىق، 1 ورىنعا 4 ادام تالاسۋدا. ءبىراق ەڭ مىقتىلارى عانا قارۋلى كۇشتەر ساپىنا الىنباق.
امانتاي وسەربايەۆ، ق ر قم ۇيىمداستىرۋ-جۇمىلدىرۋ دەپارتامەنتى باسشىسىنىڭ ورىنباسارى:
-دەنساۋلىقتارى جاقسى، ءبىلىمى بار، پسيحولوگيا جاعىنان دايىن جىگىتتەردى ىرىكتەپ، مەرزىمدىك اسكەري قىزمەتكە جىبەرىمىز. وسى كوكتەمدە قارۋلى كۇشتەردىڭ قاتارىنا 16 مىڭداي ازامات اسكەري قىزمەتكە شاقىرتىلادى.
ياعني، ۇمىتكەر كوپ بولعاندىقتان تالاپ قاتال. دارىگەرلەردىڭ تەكسەرىسى مەن پسيحولوگيالىق تەستتەن بولەك، بولاشاق ساربازداردىڭ ءدىني ۇستانىمىنا دا مۇقيات ءمان بەرىلەدى. ونى انىقتاۋ ءۇشىن ۇلتتىق قاۋىپسىزدىك كوميتەتى تارتىلادى ەكەن. ال، بارلىق سىننان سۇرىنبەي وتكەندەردىڭ تەڭ جارتىسى قورعانىس مينيسترلىگىنىڭ بولىمدەرىنە، قالعانى ۇلتتىق گۆارديا مەن ىشكى اسكەر جانە شەكارا شەبىنە اتتانادى.
ءمۇسىلىم دايىروۆ، ق ر قم ۇيىمداستىرۋ-جۇمىلدىرۋ دەپارتامەنتىنىڭ باسشىسى:
-جىلدان جىلعا تالاپ كۇشەيىپ كەلەدى. سايكەسىنشە، ساربازداردىڭ كاسىبي دەڭگەيى جوعارى. ءارى ولاردى اسكەرگە شاقىرعاندا ماماندىعى مەن قانداي قابىلەتى بارىن ەسكەرىپ، سوعان ساي جۇمىس بەرەمىز.
الايدا اسكەردەگى الىمجەتتىك، سۋيسيد تىيىلماي تۇر. بيىلدىڭ وزىندە بولىمدەردە 100-گە جۋىق قىلمىس بولىپ، سونىڭ ءبىرازى جاۋىنگەرلەردى ۇرىپ سوققاندارعا قاتىستى قوزعالىپتى. ال، مۇنداي دەرەكتەردى بولدىرماۋ ءۇشىن ساربازدارعا ءوزى تۇرىپ جاتقان قالادا قىزمەت ەتۋگە مۇمكىندىك بەرۋ ماسەلەسى ايتىلعان. ءبىراق، ۇيىنەن جىراقتا بولۋ جاۋىنگەرلەردىڭ توزىمدىلىگىن شىڭدايتىنىن ايتقان وفيسەرلەر بۇعان بۇگىن قارسىلىعىن ءبىلدىردى. بۇدان بىلاي وتان الدىنداعى بورىشىن وتەۋدەن باس تارتقاندار ءبىر جىلعا تۇرمەگە دە قامالۋى مۇمكىن. نەمەسە ءبىر ميلليون تەڭگە ايىپپۇل تولەيدى.
