بۇگىن ق ر پرەمەر-مينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ باستاعان قازاقستان دەلەگاسياسى جۇمىس ساپارىمەن جۇڭگو حالىق رەسپۋبليكاسىنىڭ بەيجىڭ قالاسىنا باردى، دەپ حابارلايدى مينيسترلىكتىڭ باسپا ءسوز قىزمەتى.
«الداعى ۋاقىتتا قحر ساپانى قاداعالاۋ، ينسپەكسيا جانە كارانتين جونىندەگى باس باسقارماسى، قحر اۋىل شارۋاشىلىعى مينيسترلىگى، قحر كوممەرسيا مينيسترلىگى، قحر حالىقارالىق ساۋدا-ساتتىققا اتسالىسۋ كوميتەتى باسشىلىعى جانە بيزنەس قاۋىمداستىعى وكىلدەرىمەن ءبىرقاتار ماڭىزدى كەزدەسۋ وتكىزۋ جوسپارلانۋدا» دەلىنگەن حابارلامادا.
دەلەگاسيا قۇرامىندا اۋىل شارۋاشىلىعى مينيسترلىگى مەن وڭىرلەردىڭ سالالىق باسقارمالارىنىڭ باسشىلارى، «قازاگرو» حولدينگى مەن ەنشىلەس ۇيىمدارى، ۇلتتىق اگرارلىق ءعىلىمي-بىلىم بەرۋ ورتالىعى وكىلدەرى جانە اۋىل شارۋاشىلىعى قاۋىمداستىقتارىنىڭ جەتەكشىلەرى مەن جەكە كاسىپكەرلەر بار.
ساپاردىڭ باستى ماقساتى – مەملەكەت باسشىسى ن.نازاربايەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىنداعى اوك-كە شەتەلدەن ينۆەستيسيا تارتۋ مەن اۋىل شارۋاشىلىعى ونىمدەرىنىڭ ەكسپورتى بويىنشا بەرگەن تاپسىرمالارىن جۇزەگە اسىرۋ جانە ەكى جاقتى ءتيىمدى كەلىسىمدەرگە قول جەتكىزۋ.
