قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتى 2017 جىلدىڭ 7 ساۋىرىندە «مەملەكەتتىك ءتىلدى ۇيرەتۋ: ءادىس، تاجىريبە، يننوۆاسيا» رەسپۋبليكالىق سەمينارىن وتكىزەدى دەپ حابارلايدى qamshy.kz.
سەميناردىڭ ماقساتى – مەملەكەتتىك ءتىلدى وقىتۋدىڭ ادىستەمەسىن جەتىلدىرۋ، وزىق تاجىريبەنى زەردەلەۋ جانە قورىتۋ، وقىتۋدىڭ يننوۆاسيالىق ادىستەرى مەن تەحنولوگيالارىن تاجىريبەگە ەنگىزۋ.
سەمينارعا ق ر مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىس كوميتەتىنىڭ قىزمەتكەرلەرى، ادىسكەر عالىمدار، ءتىل ماماندارى، استانا، الماتى قالالارى جانە وبلىس ورتالىقتارىنداعى تىلدەردى دامىتۋ باسقارمالارىنىڭ باسشىلارى، مەملەكەتتىك ءتىلدى وقىتۋ ورتالىقتارىنىڭ ماماندارى قاتىسادى.
سەمينار بارىسىندا ادىسكەر-عالىمدار مەملەكەتتىك ءتىلدى وقىتۋدىڭ ءتيىمدى تەحنولوگيالارى مەن ادىس-تاسىلدەرىمەن بولىسەدى. تىلدەردى وقىتۋ ورتالىقتارى مەن رەسپۋبليكاعا بەلگىلى ۇزدىك ادىسكەرلەر پانورامالىق جانە ونلاين رەجيمىندە شەبەرلىك ساباقتارىن كورسەتەدى.
