«تابليعي جاماعات» ءدىني ۇيىمىنىڭ يدەيالارىن ناسيحاتتاعانى ءۇشىن ت. ەسمىدى استانالىق تۇرعىنعا ايىپ تاعىلىپ، 9 ايعا باس بوستاندىعىنان ايىرىلدى، دەپ حابارلايدى استانا قالالىق پروكۋراتۋرانىڭ باسپا ءسوز قىزمەتى.

رەسمي اقپارات بويىنشا، سوتتالۋشى 2013-2015 جىلدارى «تابليعي جاماعات» ۇيىمىنىڭ يدەولوگياسىن تاراتىپ، جاقتاس جيناۋ ءۇشىن «داعۋات» جۇرگىزگەن. سوت-كەشەندى ساراپتاما قورىتىندىسى ت-نىڭ ايتقاندارىن «تابليعي جاماعات» ۇيىمىنىڭ يدەيالارى دەپ تاپقان.

سوت شەشىمى بويىنشا، ت. جازاسىن قونىس كولونياسىندا وتەيدى.

«تابليعي جاماعات» – دەسترۋكتيۆتى ءدىني ۇيىمداردىڭ قاتارىنا جاتادى. تەولوگيالىق جاعىنان اتالعان ءدىني ۇيىم يسلامنىڭ سۇننيتتىك باعىتىن ۇستانعانىمەن، ءبىرقاتار عالىم-ساراپشىلاردىڭ پىكىرىنشە، ونىڭ يدەولوگياسى يسلامنىڭ كەيبىر قاعيدالارىنا قايشى جانە راديكالدىق تۇرعىدان ۋاحابيزمگە جاقىن. ياعني، بۇل قوزعالىستىڭ يدەياسى دا بالاما ويلار مەن پىكىرلەردى جوققا شىعارادى. شىندىعىندا، يسلامنىڭ حانافي باعىتىنا مۇنداي ءبىرجاقتىلىق ءتان ەمەس ەدى.

قازاقستاندا «تابليعي جاماعات» ۇيىمى 2013 جىلى ەكسترەميستىك دەپ تانىلىپ، قىزمەتىنە تىيىم سالىنعان. بيلىكتىڭ ۇيعارىمىنشا، «تابليعي جاماعات» ورتالىق ازيادا يسلام حاليفاتىن قۇرۋدى كوزدەيدى.

قازاقستاندا 2013 جىلدان بەرى بۇل ۇيىمنىڭ قىزمەتىنە ارالاستى دەگەن ايىپپەن ونداعان ادام سوتتالدى.