قاسىم حان تۋرالى تاريحي فيلم «قازاق حاندىعى» تەلەحيكاياسىنىڭ جالعاسى ەسەپتى تۇسىرىلەدى، - دەپ حابارلايدى «قامشى» پورتالى Abai.kz-كە سىلتەمە جاساپ.
«قازاق حاندىعى» تەلەحيكاياسى سەناريي اۆتورلارىنىڭ ءبىرى سماعۇل ەلۋباي «جاس الاش» گازەتىنە بەرگەن پىكىرىندە جاڭا فيلم تۋرالى ايتتى.
«قازاق حاندىعى جوباسىنا قاتىستى جاڭالىعىمىز دا بار. وسى تاريحي جوبانىڭ جالعاسى رەتىندە پرەزيدەنت ن.نازاربايەۆ مادەنيەت جانە سپورت ءمينيسترى ارىستانبەك مۇحامەديۇلىنا قاسىم حان تۋرالى تاريحي فيلم تۇسىرۋگە تاپسىرما بەردى. بىزگە دە تاپسىرما بەرىلىپ، ءبىز، سەناريستەر، تاريحقا قايتادان كىرەيىك دەپ جاتىرمىز. بۇل ۇلكەن قۋانىش. قازاق حاندارىنىڭ ىشىندەگى ەڭ مىقتى، ايتۋلى حان – قاسىم. قازاقتىڭ قازىرگى تەرريتورياسىنىڭ نەگىزىن سول قاسىم حان كۇرەسپەن، شايقاسپەن ءجۇرىپ قالىپتاستىرعانى بەلگىلى. سوندىقتان بۇل جوبا قىزىقتى بولادى دەپ ويلايمىن. قالىڭ كورەرمەندى وسى ءبىر قۋانىشتى حابارمەن قۇتتىقتاپ قويايىن دەپ ەدىم»، – دەيدى سەناريست.
قاسىم حان – حاندىقتى قۇرۋشىلاردىڭ ءبىرى جانىبەكتىڭ بالاسى. ونىڭ حاندىق قۇرعان تۇسىندا قازاق جەرىنىڭ شەكاراسى كەڭەيىپ، مەملەكەتتىڭ دامۋى، ءوسۋى قارقىن العان.
ازىرگە جاڭا تاريحي كينو جوبانى قانداي رەجيسسەر تۇسىرەتىنى بەلگىسىز.
