ەل تاۋەلسىزدىگىنىڭ شيرەك عاسىرلىق مەرەيتويى  مەن حان باتىر، ءىرى قولباسشى  - قاراكەرەي قابانبايدىڭ 325 جىل تولۋىنا وراي شىعىس قازاقستان وبلىسى، ءۇرجار اۋدانىنىڭ ورتالىق الاڭىنا باتىرعا ارنالعان ەسكەرتكىش تۇرعىزىلدى.  

ەسكەرتكىشتىڭ رەسمي اشىلۋ سالتاناتىنا ءۇرجار اۋدانىنىڭ اكىمى، وبلىستىق جانە اۋداندىق ءماسليحات دەپۋتاتتارى، اۋداندىق ارداگەرلەر كەڭەسى مەن زيالى قاۋىم وكىلدەرى، الىپ شاھار الماتىدان جوبا اۆتورى، الماتى قالالىق ءماسليحاتتىڭ III، IV،V- شاقىرىلىمىنىڭ دەپۋتاتى، قازاقستان رەسپۋبليكاسى ءماسليحاتتارىنىڭ قۇرمەتتى دەپۋتاتى، الماتى قالاسى قوعامدىق كەڭەسى مادەني ساياسات كوميسسياسىنىڭ ءتوراعاسى، قوعام قايراتكەرى، يدەيا اۆتورى – شالابايەۆ قۇسمان كارىم ۇلى باستاعان ءبىر توپ دەلەگاسيا قاتىستى.

«تەڭدەسى جوق ەرلىكتىڭ سيمۆولىنداي بۇل ەسكەرتكىش ەلگە كەرەك،  كەلەشەك ۇرپاققا كەرەك، قازاقتىڭ ىنتىماق-بىرلىگى ءۇشىن كەرەك. بۇل ەسكەرتكىش – حالقىمىزدىڭ قاhارماندىعى مەن بىرلىگىنىڭ كۋاسى. جاس ۇرپاقتى پاتريوتيزمگە باۋلۋدا باعا جەتپەس ۇلگى-ونەگە بولىپ قالاتىندىعى ءسوزسىز» ، - دەدى ءۇرجار اۋدانىنىڭ اكىمى سەرىك زاينۋلدين. سونىمەن قاتار، ەسكەرتكىشتىڭ تۇرعىزىلۋىنا مۇرىندىق  بولعان، ءوز قارجىسىنا ەسكەرتكىش ورناتقان قۇسمان كارىم ۇلى شالابايەۆقا اۋدان حالقىنىڭ اتىنان العىس ءبىلدىردى.

ءمۇسىنىن جاساعان قازاقستان سۋرەتشىلەر وداعىنىڭ مۇشەسى، ەلىمىزگە تانىمال ءمۇسىنشى بولات دالباس ۇلى قۇسايىنوۆ.  باتىر ەسكەرتكىشىنىڭ بيىكتىگى 10 مەتر، گرانيت تاستان قاشالىپ جاسالعان. وسى اتقارىلعان جۇمىسى ءۇشىن ءمۇسىنشى بولات قۇسايىنوۆ ءۇرجار اۋدانى ءماسليحاتىنىڭ شەشىمىمەن ءۇرجار اۋدانىنىڭ  قۇرمەتتى ازاماتى اتاعىن الدى. جوبا اۆتورلارى باتىردىڭ بەينەسىنە ەرەكشە نازار اۋدارعان. ويتكەنى شايىردىڭ بەينەسى ادەتتەگىدەي اتتىڭ ۇستىندە ەمەس، قاسقايىپ تىك تۇر. 

«جەر-جەردە اتپەن تۇرعان باتىرلاردىڭ بارلىعى بىر-بىرىنە ۇقساس، اجىراتا المايمىز. تەك قانا باتىر دەگەن اتى عانا. ءتىپتى ات پەن باتىردىڭ بەينەسى ءبىر – بىرىنە سايكەس كەلمەيدى. سوندىقتان ءبىزدىڭ ەسكەرتكىشكە بەرگەن وبرازىمىز، سوڭعى تۇيىندەگەن ويىمىز – بىلەكتىڭ كۇشى، نايزانىڭ ۇشى. وسىنداي اسەرمەن جاسالعان وبرازدىق دۇنيە بولىپ شىقتى» - دەدى جوبا اۆتورى قۇسمان شالابايەۆ.

سونىمەن قاتار، مەرەكە بارىسىندا قازاق حالقىنىڭ ۇلى قولباسشىسى قاراكەرەي قابانباي باتىرعا ارنالعان عىلىمي – تانىمدىق كونفەرەنسيا ءوتتى. سايكەسىنشە اۋىل جۇرتى مەن قوناقتارىنا باتىردىڭ رۋحىنا ارنالعان اس بەرىلدى. ايتا كەتەيىك، بيىل ءۇرجار جۇرتشىلىعى باتىر بابامىزدىڭ 325 جىلدىعىن دۇركىرەتىپ اتاپ وتپەكشى.