كاسىپقوي بوكستان ورتا سالماقتاعى WBA (Super)، WBC، IBF جانە IBO چەمپيوندىق بەلبەۋلەرىنىڭ يەسى قازاقستاندىق گەنناديي گولوۆكيننىڭ مەنەدجەرى ولەگ گارمان استانا اكىمدىگىنىڭ وتىرىگىن اشكەرەلەدى، دەپ حابارلايدى Vesti.kz

ەسكە سالايىق، بۇگىن استانا قالالىق دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپايەۆ 17 شىلدە كۇنى "استانا-ارەنادا" گەنناديي گولوۆكيننىڭ بريتان بوكسشىسىمەن جەكپە-جەگى وتەدى دەپ مالىمدەگەن بولاتىن. الايدا، GGG كومانداسى بۇل اقپاراتتىڭ وتىرىك ەكەنىن ايتىپ وتىر.

"بۇگىنگى تاڭدا گەنناديي گولوۆكيننىڭ قازاقستانداعى جەكپە-جەگى تۋرالى ەشقانداي مالىمەت جوق. سايكەسىنشە، كەزدەسۋدىڭ وتەتىن كۇنى، ورنى، ءتىپتى قارسىلاستىڭ كىم ەكەنى دە بەلگىسىز. سوندىقتان بيلەتتەر جاقىندا ساتىلادى دەگەن اقپارات شىندىققا جاناسپايدى"، - دەيدى ولەگ گەرمان.

ول استانا اكىمدىگى قىزمەتكەرلەرىنىڭ 17 شىلدە دەگەن داتانى قايدان تاۋىپ العانىنا تاڭ قالىپ وتىر.

"گەنناديي گولوۆكيننىڭ قاتىسۋىمەن وتەتىن بوكس كەشتەرى ۇنەمى اپتانىڭ سەنبىسىنە جوسپارلانادى. ال، 17 شىلدە دۇيسەنبىگە ءتۇسىپ تۇر. استانا اكىمدىگىنىڭ بۇل داتانى قايدان تاۋىپ العانىنا تۇسىنە الماي وتىرمىن. ەگەر بۇل جەكپە-جەك تۋرالى راستالعان اقپارات بولسا ەڭ ءبىرىنشى ونى ءبىزدىڭ كوماندا تاراتادى"، - دەپ اتاپ ءوتتى GGG مەنەدجەرى.

ەستەرىڭىزگە سالايىق، بۇعان دەيىن مادەنيەت جانە سپورت ءمينيسترى ارىستانبەك مۇحامەدي ۇلى دا استانادا گولوۆكين-سوندەرس جەكپە-جەگىنىڭ وتەتىنىن مالىمدەگەن بولاتىن. ونىڭ ءسوزىن دە GGG كومانداسى ارتىنشا جوققا شىعاردى.