قوستاناي وبلىسىنىڭ سارىكول اۋدانىنىڭ ورتالىعىندا ورنالاسقان «وليمپ» ەمدەۋ-ساۋىقتىرۋ كەشەنىندە ەستىگەن جاننىڭ جاعاسىن ۇستاتاتىن وقيعا بولعان. تۋعان كۇن كەشىن كوڭىلدى وتكىزگىسى كەلگەن اۋداندىق ىشكى ىستەر ءبولىمىنىڭ قىزمەتكەرى جۇرتشىلىقتىڭ كوزىنشە تىر جالاڭاش باسسەيىنگە شومىلعان، پوليسيا مايورى قىزمەتىنەن كەتتى، دەپ حابارلايدى Baq.kz
ءبىر قىزىعى، «وليمپ» ەمدەۋ-ساۋىقتىرۋ كەشەنىنىڭ قوجايىنى مايوردىڭ ەرسى قىلىعى تۋرالى اۋداندىق ىشكى ىستەر بولىمىنە شاعىم تۇسىرگەنىمەن، ونى ارىپتەستەرى جىلى جاۋىپ قويىپتى. تەك قانا «سارىكول» اۋداندىق گازەتىنىڭ باس رەداكتورى ايجان مۋساتوۆا مەن وبلىستاعى بەلدى باسىلىم «ناش كوستانايدىڭ» ارالاسۋىمەن ءتارتىپ ساقشىسى لايىقتى جازاسىن الىپ وتىر.
جوعارىدا اتالعان ساۋىقتىرۋ كەشەنى قىزمەتكەرلەرىنىڭ كوز الدىنان سول كۇنگى بولعان وقيعا ءالى كەتەر ەمەس.
«اۋداندىق ىشكى ىستەر ءبولىمىنىڭ قىزمەتكەرى، پوليسيا مايورى ەربولات ۋتەبايەۆ ءوزىنىڭ 5 ارىپتەسىمەن ءبىزدىڭ كەشەنگە كەلدى. بۇل بىلتىرعى جىلدىڭ سوڭىندا كەشكى ساعات 22.00 شاماسى بولاتىن. ءتارتىپ ساقشىلارى مايوردىڭ تۋعان كۇنىن اتاپ وتپەك بولعان ەكەن. ولار بارلىق كەشەندى جالداپ العان. ال، ءبىزدىڭ قىزمەتكەرلەر بۇل جەردە ىشىمدىك ىشۋگە قاتاڭ تىيىم سالىنعانىن ايتتى. كەشەن ساۋىقتىرۋ سالاسىنا باعىتتالعانىن جەتكىزدى. ونى ەستىگەن ءتارتىپ ساقشىلارى تەز كەتىپ قالدى. ال، سوڭىندا قالعان مايور سۋعا شومىلىپ سالقىنداعىسى كەلگەن بولۋى كەرەك، جىلدام شەشىنە باستادى. وسى ساتتە باسسەين قىزمەتكەرلەرى بۇرىنعى ءتارتىپ ساقشىسىنا سۋعا تۇسەتىن ارنايى ءىش كيىم كيۋدى ۇسىنادى. ارنايى كيىمى بولماعان مايور مىرزا كوپ ويلانباستان تىر جالاڭاش شەشىنىپ، سۋعا قويىپ كەتتى. بۇل كەزدە ول جەردە ەرەسەكتەرمەن قاتار بالالار دا بولاتىن»، – دەيدى «تريو» ج ش س نەگىزىن قالاۋشىلاردىڭ ءبىرى سااك مەلويان.
شەكتەن شىققان بۇرىنعى ءتارتىپ ساقشىسىنىڭ ەرسى قىلىعىنا شىداي الماعان ساۋىقتىرۋ كەشەنىنىڭ اكىمشىسى سول ارادا 102-گە حابارلاسىپ، كومەك سۇراپتى. ال، وقيعا بولعان جەرگە جەتكەن ءتارتىپ ساقشىلارى ارىپتەستەرىنىڭ قىلىعىن بۇرمالاپ كورسەتىپ، شاقىرعانداردى كىنالى قىلىپ كەتىپتى.
«سول كۇنى مەن ترەناجەر زالىندا جاتتىعۋ جاساپ جاتقان ەدىم. ءبىر كەزدە ادامدار شۋلاپ كەتتى. كەلسەم، الگى ەر ادام كيىنىپ ۇلگەرىپتى. ءبىراق، بارلىق جۇرتتى بوقتاپ، اۋزىنا تۇسكەنىن ايتىپ ءجۇردى. ال، شاقىرعان ءتارتىپ ساقشىلارى جەتكەنشە ءىزىن سۋىتىپ ۇلگەردى»، – دەيدى سارىكول اۋدانىنىڭ تۇرعىنى، وقيعا كۋاگەرى زينا كينگان.
ءبىراق، كەلەسى كۇنى بالا-شاعا مەن تۇرعىنداردىڭ زارەسىن العان مايوردىڭ ىسىنە قاتىستى شىندىققا جاناسپايتىن دەرەكتەر شىعادى. ول جەردە ەشقانداي ءتارتىپ ساقشىسى بولماعان. تەك بەيتانىس ەر ادام قىزمەت اقىسىن تولەمەگەن دەگەن اقپارات تاراتقان. وسىلايشا ءوز ابىرويلارىن ويلاعان پوليسەيلەر ءىستى جىلى جاۋىپ قويماق بولىپتى.
«مەنى تاڭعالدىرعانى پوليسيا قىزمەتكەرىن دارىگەرلىك تەكسەرۋدەن وتكىزىپ، ىشىمدىك ىشپەگەن دەگەن انىقتاما دايىنداعان. مەن ونىڭ اياعىنان ارەڭ تۇرعانىن كوردىم عوي. قوعامدىق ءتارتىپتى قاداعالايتىن ساقشىلارىمىز وسىنداي ۇياتسىز ىسكە بارسا، باسقاسىنان نە ءۇمىت كۇتەمىز»، – دەپ قىنجىلادى اۋداندىق «سارىكول» گازەتىنىڭ باس رەداكتورى ايجان مۋساتوۆا.
«جەرگىلىكتى «ناش كوستاناي» گازەتىنە «وليمپ» ەمدەۋ-ساۋىقتىرۋ كەشەنىندە ءوز قىزمەتىن اسىرا پايدالانىپ، باسسەينگە تىر جالاڭاش شومىلعان سارىكول اۋداندىق ىشكى ىستەر ءبولىمىنىڭ قىزمەتكەرىنە قاتىستى ماقالا شىققان سوڭ كەڭ كولەمدە قىزمەتتىك تەكسەرۋ جۇمىستارى جۇرگىزىلدى. تەكسەرىستىڭ ناتيجەسى بويىنشا تارتىپتىك كەڭەس جوعارىدا ەسىمى اتالعان ءتارتىپ ساقشىسىن قىزمەتىنەن بوساتۋ تۋرالى شەشىم شىعاردى. سونىمەن قاتار، وسى باسسىزدىققا كوز جۇما قاراعان اۋداندىق ىشكى ىستەر ءبولىمى باستىعىنىڭ 2 ورىنباسارى دا تارتىپتىك جاۋاپكەرشىلىككە تارتىلدى»، – دەيدى قوستاناي وبلىستىق ءىىد باسپا ءسوز حاتشىسى ەلەنا كاشارينا.
