مينيسترلىك حالىقارالىق باعىتتارداعى اۋە تاسىمالىن ارتتىرۋ ماقساتىنداعى جوسپارلى جۇمىسىن جالعاستىرادى. وتكەن جىلى 7 حالىقارالىق باعىتتا اۋە رەيستەرى اشىلدى. ولار – استانادان امستەردامعا، الماتىدان سيان، شارم-ەل-شەيح جانە تەگەران قالالارىنا، اقتاۋدان باتۋمي جانە سوچي قالالارىنا، سونداي-اق، شىمكەنت-ىستامبۇل اراسىندا اشىلعان اۋە رەيستەرى. بۇل تۋرالى الەۋمەتتىك جەلىدە ينۆەستيسيالار جانە دامۋ ءمينيسترى جەڭىس قاسىمبەك جازدى.
"حالىقارالىق باعىتتاعى سۇرانىستار جىل سايىن ارتىپ كەلەدى. ماسەلەن، بيىل استانادا وتەتىن ەكسپو-2017 كورمەسىن وتكىزۋىمىزگە بايلانىستى، «استانا» حالىقارالىق قارجى ورتالىعىن دامىتۋعا بايلانىستى قازاقستان مەن ەۋروپا ەلدەرى اراسىندا شەتەلدىك اۋە كومپانيالارىمەن بىرلەسىپ جاڭا باعىتتار اشۋ جوسپارلانىپ وتىر. 
2017 جىلدىڭ 8 مامىرىندا پولشالىق LOT Polish Airlines اۋە كومپانياسى استانا-ۆارشاۆا باعىتىندا اپتاسىنا 4 رەت قاتىنايتىن جاڭا اۋە رەيسىن اشادى. سونداي-اق، استانا-بۋداپەشت اراسىنداعى العاشقى اۋە قاتىناسى وسى جىلدىڭ 1 ماۋسىمىندا اشىلادى. كەشە ورتالىق جانە شىعىس ەۋروپاداعى ەڭ ءىرى لوۋ-كوست اۋە تاسىمالداۋشىسى Wizz Air اۋە كومپانياسى استانا مەن بۋداپەشت اراسىنداعى جاڭا اۋە قاتىناسىنىڭ ىسكە قوسىلاتىنىن جاريالادى. جاڭا اۋە قاتىناسى اپتاسىنا ەكى رەت، بەيسەنبى جانە جەكسەنبى كۇندەرى جۇمىس ىستەيتىن بولادى. بۇل قازاقستان جانە ۆەنگريا اراسىنداعى ديپلوماتيالىق قارىم-قاتىناستاردىڭ 25 جىلدىعىنا وراي جاسالعان كەرەمەت تارتۋ.
19 ماۋسىمنان باستاپ FinnAir اۋە كومپانياسى استانا-حەلسينكي باعىتىندا اپتاسىنا 2 رەت قاتىنايتىن جاڭا باعىتتى ىسكە قوسادى. ماۋسىم ايىنان باستاپ استانا-بەيجىڭ باعىتىندا اپتاسىنا 3 رەت Air China ۇشاقتارى قاتىنايتىن بولادى. قازاقستاندىق اۋە كومپانيالار دا حالىقارالىق باعىتتار بويىنشا ءورىسىن كەڭەيتپەك. 2017 جىلدىڭ ماۋسىم ايىنان باستاپ «ەير استانا» استانا-ۋلان-باتور اراسىندا، «SCAT» اۋە كومپانياسى استانا-ەريەۆان اراسىندا جاڭا اۋە رەيستەرىن اشادى. 
«ەير استانا» اۋە كومپانياسى حالىقارالىق باعىتتا جاڭا اۋە رەيستەرىن اشۋ ءۇشىن ۇلكەن جۇمىس اتقارىپ جاتىر. 2019 جىلى استانادان سينگاپۋر مەن توكيوعا، 2020 جىلى شانحاي مەن نيۋ-يورك باعىتىنداعى جاڭا رەيستەر اشۋ جوسپارىندا بار."