قىتايدا سوتتالعان 14 قازاقستاندىق ەلگە ورالىپ، جازاسىن وتەۋدە. بۇل جايىندا ق ر باس پروكۋراتۋراسىنان ءمالىم ەتتى، دەپ حابارلايدى قازاقپارات.
ايتا كەتەيىك، ق ر باس پروكۋرورى جاقىپ اسانوۆ 30-31 ناۋرىز كۇندەرى قحر-عا ساپارمەن بارىپ، سول ەلدىڭ ادىلەت ءمينيسترى چجان سزيۋنمەن زاڭ سالاسىنداعى مەملەكەتتىك قىزمەتتەردى ۇسىنۋدىڭ اشىقتىعى جانە قىلمىستىق-اتقارۋ جۇيەسىن جەتىلدىرۋ ماسەلەلەرىن تالقىلادى. كەزدەسۋدە جاقىپ اسانوۆ قحر-دا سوتتالىپ، ايىبىن وتەپ جاتقان 9 قازاقستاندىق ازامات تۋرالى ءسوز قوزعادى. ولاردىڭ قازاقستانعا اۋىسقىسى كەلەتىنىن، ءبىراق قحر-دا ولارعا سالىنعان ايىپپۇلدى تولەۋگە مۇمكىندىكتەرى جوق ەكەندىگىن ايتتى.
جالپى، ق ر باس پروكۋراتۋراسىنىڭ مالىمەتتەرىنشە. اعىمداعى جىلدىڭ 14 ناۋرىزىندا قىتايدان ءۇش وتانداسىمىز ەلگە جازاسىن ودان ارى وتەۋ ءۇشىن جەتكىزىلگەن.
«2017 جىلدىڭ 22 اقپانىندا قىتايدىڭ ادىلەت مينيسترلىگى ق ر باس پروكۋراتۋراسىنىڭ اتالعان ماسەلەگە قاتىستى قولداۋ حاتىن قاناعاتتاندىرعان بولاتىن. ازامات ك. مەن ر. قۇنى 3،5 ملن. دوللاردان اساتىن امۋر كيىگىنىڭ 719 دانا ءمۇيىزىن كونتراباندالاعانى ءۇشىن جۇڭگو سوتى تاعايىنداعان جازالارىن وتەگەن. ءۇشىنشى ازامات تا قىتايعا جالپى قۇنى 115 مىڭ اقش دوللارىن قۇرايتىن ايۋ تەرىسىن، 35 دانا ايۋ تابانىن جانە 13،71 كەلى كورديسەپستى (ءداستۇرلى جۇڭگو مەديسيناسىندا قولدانىلاتىن سيرەك كەزدەسەتىن ساڭىراۋقۇلاق ءتۇرى) كونتراباندالىق جولمەن تاسىمالداعان»، - دەلىنگەن اقپاراتتا.
سونىمەن قاتار ۆەدومستۆو اقپاراتىندا جۇڭگو سوتتارىنىڭ ۇكىمى قازاقستان اۋماعىندا دا مويىندالاتىندىعى جانە ۇلتتىق زاڭنامامىزعا سايكەس جۇزەگە اسىرىلاتىندىعى اتاپ وتىلگەن.
«ءبىزدىڭ ازاماتتارىمىزعا جازا مەرزىمىن ودان ارى وتانىندا وتەۋگە مۇمكىندىك بەردى. اتاپ وتەرلىگى، قىتايلىق ارىپتەستەرمەن ءىس-قيمىلدىڭ جولعا قويىلۋىنىڭ ارقاسىندا قحر-مەن سوتتالعانداردى ءوزارا بەرۋ تۋرالى شارت كۇشىنە (30.09.2015) ەنگەن ساتتەن بەرى 14 قازاقستاندىق ەلگە قايتارىلدى. بۇگىنگى كۇنى جۇڭگو تۇرمەلەرىندە تاعى 9 قازاقستاندىق جازاسىن وتەۋدە. اتالعان تۇلعالاردىڭ 10-نان 100 مىڭ يۋانعا دەيىن تولەنبەگەن ايىپپۇلدارى بار. وسىعان بايلانىستى ولاردى قازاقستانعا اۋىستىرۋدان باس تارتىلعان. قازىرگى ۋاقىتتا ولاردىڭ تەك ۇشەۋى عانا ايىپپۇلدارىن تولەپ، باس تارتۋ شەشىمى قايتا قارالۋدا. بۇل باعىتتاعى جۇمىستار جالعاسادى»، - دەدى باس پروكۋراتۋرا باسپا ءسوز قىزمەتىنەن.
پىكىر قالدىرۋ